Diyarname
Dermanasê kurd Alî Gul Ozbek wekî Şaredarê Herêma Haringey a Londonê hat hilbijartin. Herêma Haringey ku hejmara şêniyên wê derdora 250 hezarî ye, wekî taxeke pirçandî ya Londonê tê nasîn. Her wiha hejmareke bilind a kurdan jî li vê taxê jiyana xwe didomînin. 

Şaredara Haringey a berê Jeniffer Man êvara duşemê bi merasimekî peywira xwe li hola Alexandra Palace dewrî Alî Gul Ozbek kir. 

Şaredarê nû yê Haringey Ozbek bi eslê xwe kurdekî elewî yê ji eşîra Alxasiyan a Elbistanê ye. Ew 25 sal in ku li Brîtanyayê dijî û li herêma ku niha li wê bû şaredar jî dermanxaneyekî bi rê ve dibe. Ozbek di 2014’an de ji Partiya Karkeran wekî endamê Meclisa Bajêr hatibû hilbijartin. 

Li gor nûçeya telgraf.co.uk, Ozbek di merasimê de destpêkê bi kurdî silav da kesên amade û dû re axaftina xwe bi îngilîzî berdewam kir. Ozbek di axaftina xwe de diyar kir ku ew ê di dema peywira xwe ya şaredariyê de xizmetê ji hemû şêniyên taxê re bike. Wî her wiha destnîşan kir ku li wê herêmê miletên ji çandên cuda hene û bûyîna şaredarê vê herêmê ji bo wî cihê serfiraziyê ye.

Di merasimê de ji bilî nûnerên saziyên cuda, parlamaneterê HDP’ê yê Şirnexê Faysal Sariyildiz jî amade bû. Her wiha ji bilî siyasetmedaran, nûnerên gelek saziyên kurd û elewiyan jî amade bûn. Ji bilî semaha zarokan û gulbanga pîrê elewî Mehmet Yuksel, hunermand Tara Jaff jî bi harpa xwe stran pêşkêş kirin.  

**

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.