Diyarname
YSK'ê digel ku berendamtiya Selma Irmaka DTP'yî ya jibo Dêrikê erê kiribû jî niha betal kir.

Li temamê Tirkiyeyê lîsteya dawî ya berendamên şaredariyan di 1'ê adarê de ji aliyê YSK'ê ( (Lijneya Bilind a Hilbijartinê) ve hate eşkerekirin. Li gor daxuyaniya YSK'ê berendamên partiyan bi vê lîsteyê dê beşdarî hilbijartinê bibana. Lê digel ku di lîsteya YSK'ê de navê berandama DTP'ê Selma Irmak ya li Dêrikê hebû jî YSK'ê niha biryareke nû da û berendamtiya Irmak betal kir. Bi vî awayî YSK bi lîsteya xwe ya ku eşkere kiribû jî ket nava nakokiyê.

Li ser vê yekê DTP'ê îro daxuyaniyeke çapemeniyê weşand û got: "Betalkirina berendamtiya Selma Irmak biryareke siyasî ye. Ev biryar parçeyeke êrîşan a li ser partiya me ye. Biryareke ku hatiye eşkerekirin û hatiye ragihandin bêyî sedemeke betalkirina wê tişteke bi fikar e.
Her wiha DTP'ê got ku wan bi daxwaznameyê serî li Lijneya Hilbijartina Navçeyê ya Dêrikê daye û hêvî dikin ku dê ev biryara nehiqûqî bê betalkirin.

Di vê navberê de YSK'ê herî dawî biryar da ku Irmak nikare bibe berendam lê DTP'ê heta roja 7'ê mehê saet 17'an dikare berendamek din nîşan bide.