Diyarname
Ev 11 roj in li Farqînê qedexeya derketina kuçeyan didome û heta niha 7 sivîlan jiyana xwe ji dest daye. Piştî ew qas rojan Farqîn dikeve rojeva dinyayê.

Bloka Aştiyê name şand
Bloka Aştiyê bi diruşma "Farqîn ne bi tenê ye" li TMMOB'ê daxuyaniyek da çapemeniyê. Heseroka HDK'ê Sebahat Tuncel, Seroka Giştî ya EMEP'ê Selma Gurkan, mebûsan HDP û CHP'ê û endamên blokê beşdarî daxuyaniyê bûn.

Hevberdevkê Bloka Aştiyê Gencay Gursoy daxuyanî xwend û got: "Ji bo em welatê ku li hemberî gelê xwe şer dike li pêşberî dinyayê şermezar bikin em vê civînê li dar dixin. Gursoy got ku tiştên li Ferqînê diqewimin gihîştine wê astê ku li dinyayê deng vebidin û got: "Îro em tam nizanin çend kes hatine kuştin. Em bang dikin ku raya giştî bikeve nava tevgerê."

Gursoy diyar kir ku Bloka Aştiyê ji bo piştgiriyê nameyek bi çar zimanan ji bo saziyên navneteweyî nivîsandine.
Di nameyê de qala bi serdegirtina 170 ofîsên HDP'ê, teqîna bombeyan a li Mîtînga HDP'ê ya Amedê, bombekirina ofîsên HDP'ê yên Eden û Mêrsînê, bombekirina 33 ciwanan li Pirsûsê jî hatiye kirin û wisa hatiye gotin: "Her ku bombekirin û kuştin zêd ebûye hin rayedarên herêma kurdan ji bo parastina gel 'xweserî' ragihandine. Bersiva hikumeta Tirkiyeyê jî li hemberî vê yekê bi hêzên ewlehiyê êrîşên cidî kirine. 24 saetan biryara qedexeya derketina kuçeyan hatiye dayîn, leşker û tîmên taybet êrîşê van deran kirine, nîşangirên li ser xaniya bi cih kirine jî gule bera gelên sivîl dane; jin, ciwan û extiyar hatine kuştin."

Di nameyê de hatiye gotin ku ji 2'yê vê mehê ve li taxên Tekel, Mescit û Konakê qedexeya derketina derve hatiye dayîn, bi awayekî fiîlî dagirkirina leşker û polîsan didome.
Her wiha qala gotina yek ji rayedarên Wezareta Karên Hundir ku ji bo Mebûsê HDP'ê yê Amedê Ziya Pîr kiribû ku gotibû, "Emê her sê taxan ji nexşeyê jê bibin" û wiha hatiye gotin: "Bêyî li gelê sivîl binêrin êrîşê her derê dikin"

Gursoy got ku di asta navneteweyî de bi awayekî lezgîn piştgiriyek saz bibe dibe ku guherîn çêbibe û got: "Ji bo jiyan bê rizgar kirin divê êrîşên hêzên ewlehiyê ya li dijî sivîlan bisekine; destûr bidin mebûs, nûnerên mafên mirovan û delegasyona aştiyê ku bikevin taxan û ji bo çavdêrên navneteweyî destûr bê dayîn ku xwe bigihînin taxan."

Mungan: Em Farqînê bi tenê nahêlin

Nivîskar Murathan Mungan jî li civînê got ku em Farqînê bi tenê nahêlin û wisa got: "Ji bo mirovan tenêtî tiştek baş e lê bitêhiştina Farqînê tiştek din e, em nikarin tiştek wisa bikin. Farqîn ne bi tenê ye, ji ber ku Tirkiye bi tenê ye. Ji bo em Farqînê ji bitenêbûnê rizgar bikin divê Tirkiye ji bitenêbûnê rizgar bibe. Ev teka rêye.

 
TÎHV: Li Farqînê 14 sivîl hatin kuştin
Serokê Komeleya Mafên Mirovan a Amedê Raci Bilici, Serokê TÎHV'a Amedê Bariş Yavuz, Serokê Odeya Tabibên Tirk a Amedê Dr. Cengiz Gunay li ser Farqînê daxuyanî dan çapemeniyê.  Bilici got ku em wekî nûnerên saziyên mafên mirovan gelek caran çûn Farqînê lê nehiştin em herin wê taxê û got, "Me wisa dît ku niha operasyon ji navendên têne bi rê ve birin û eleqeya tu brokratên herêmê bi buyerê re tune ye. Ev rewşeke gelek xeternak e."
Yavuz jî wisa got, "Sê taxên ku qedexeya derketina kuçeyan lê dane serjimariya wir 14 hezar û 345 kes e. Hûn li hemberî 14 hezar kesî operasyonê li dar dixin? Ev yek ne êrîşa li dijî xendekê, ne jî li dijî sûcek e, ev yek şerek giştî ya li hemberî bajarek e."
Gunay jî wisa got, "Taxek bi temamî av lê nîn e ji ber ku lûleyên avê teqiyane. Li gor me agahî girt bi ser muxtaran re ji bilî nanê tisî xureke din naşînin taxê. Ew mirovên li wir ev 11 roj in çi dixwin, çi vedixwin, çi didin zarokên xwe?"
Gunay got "êdî bes e" û wisa dom kir: "Dest ji operasyonên ku dê negihîjin armancên xwe berdin. We xendekek jî negirtiye. Li wir gelê sivîl dimire. Ji ber tetikêşên nîşangir gule ber didin birîndaran ji nabin nexweşxaneyê. Hemû mirovên li her sê taxan têne cezakirin."

Gule bera Yuksekdag û gel dan
Hevseroka HDP'ê Figen Yuksekdag jî di nav de komek gel xwest bikevin nav taxê lê hêzên dewletê gule bera wan da. Li ser bûyerê Hevserokê HDP'ya Amedê Omer Oner wisa got: "Dema em ber bi taxa Tekelê ve meşiyan gule bera me dan. Hevseroka me Yuksekdag, mebûsên me İdris Baluken û Ertugrul Kurkçu jî hebûn. Pênc kes wê çaxê birîndar bûn." Ji birîndaran Ustu Guneş xidar birîndar bûye.
Duh ji TOMA'yê bi ava bi şid û bi gava çavsotîner êrîşê Yuksekdag û gelê pêre hatibû kirin.