AMED (DÎHA)

Welatiyê bi navê Îsmaîl Bozkurt ê ji bo dermankirinê anîn Nexweşxaneya Herêmê ya Êlihê yê ligel ku Serwîsa Cerahiya Plastîk heye jî bi hinceta tuneye negirtin nexweşxaneyê. Ji bo Murat Karaslan ê ji lingê xwe birîndar e jî ambulans nehat şandin. Malbata Bozkurt a ku zarokên xwe yên birîndar ji Farqînê birin Êlihê banga "Ferqa Farqînê ji Kobanî nemaye. Bi guleyan êrîşî gel dikin. Bi sedan ciwan bi qatlîamê re rû bi rû ne. Divê gel rabin ser piyan û biherikin Farqînê" kir. 

Li navçeya Farqînê ku Walîtiya Amedê derketina kolanan qedexe kiriye û ji aliyê polîs û leşkeran ve tê xwestin qetlîam pêk bê ji ber bombeya ku teqiya kesek bi navê Îsmaîl Bozkurt (24) birîndar bû û bi ambulansê anîn Êlihê û nexweşxane bi nexweşxane tê gerandin. Bozkurt ligel ku li nexwexaneyê Beşa Cerahiya Plastîk heye jî bi hinceta tuneye negirtin nexweşxaneyê. Bozkurt birin naxweşxaneya Taybet a Êlihê. 

Parlamentera HDP'ê Saadet Becerîklî diyar kir ku ew dizanin li nexweşxaneyê Beşa Cerahiya Plastîk heye lê birîndar bi awayek kêfî negirtine nexweşxaneyê û ew bi serbijîşkê nexweşxaneyê re hevdîtin pêk anîne û wî jî gotiyê li nexweşxaneyê beşa navborî heye lê agahiya wî tuneye ka çima birîndar negirtine nexweşxaneyê. 

Bozkurtê ku birin Nexweşxaneya Dunyayê ya Taybet a Êlihê ji ber teqînê rûyê wî parçe bûye, li vir piştî dermankirinê  li bendê ye bibin Nexweşxane Herêmê ya Êlihê.

Malbata Bozkurt jî anî ziman ku navçe ji aliyê polîs û leşkeran ve hatiye dorpêçkirin û ev tişt anîn ziman: "Tu ferqa Farqînê ji Kobanî nemaye. Bi guleyan êrîşî gel dikin. Bi sedan ciwan bi qatlîamê re rû bi rû ne. Divê gel rabin ser piyan û biherikin Farqînê. Ne wisa be dê qetlîamek pêk bê."

Ji bo birîndar ambulans nehat şandin

Welatiyê bi navê Murat Karaaslan ê ku dîsa li Farqînê di êrîşê hêzên dewletê de birîndar bûye saet di 07.30'an de ji lingê xwe yê çepê birîndar bûye. Karaaslan ê ku ambulans nehatiye dayîn bi derfetên xwe çûye Nexweşxaneya Dewletê ya Farqînê. Li vir xebatkarên nexweşxaneyê gotine "Polîs bi gotina 'Hûn alîkariya terorîstan dikin' nahêlin em birîndaran bigirin." Karaaslan ê ku dereng birine nexweşxaneyê gelek xwîn winda kiriye, ji wir anîn Nexweşxaneya Lêkolîn û Perwerdehî ya Gazî Yaşargîlê. Ew li bendê ye ku bê emeliyatkirin. 

Pîr: Me agahiya 2 kesan jiyana xwe ji dest dane girt

Li aliyê din Parlamenterê HDP'ê yê Amedê Ziya Pîr diyar kir ku agahiya 2 kesan jiyana xwe ji dest dane gihîştiye wan. Yek ji kesên ku jiyana xwe ji dest daye Serhat Bîlen ê temenê wî di navbera 20-25'an e, ji serê xwe birîndar bûye û li Amedê di nexweşxaneyê de jiyana xwe ji dest daye ye. Der barê kesê duyemîn ê ku jiyana xwe ji dest daye de agahî nîn in.

- Ev nûçe li dor nîvrokî hatiye weşandin