Amed

Şaredarê Bajarê Mezin ê Stenbolê Ekrem Îmamoglu îro çû Amedê û hin hevdîtin pêk anîn. Îmamoglu ligel Şaredarên Amed û Mêrdînê jî hat ba hev.

Temaşevanên Amed Sporê jî di nav de komek qelebalixek pêşwazî li Îmamoglu kir. Ew ji wir çû Rêxistina CHP'ê ya Amedê û li wir ligel Serokê CHP'ya Amedê Mehmet Sayin daxuyanî da. Îmamoglu li vir piştgirî da şaredarên ku ji peywirê hatine girtin û got ku hikumet xwe bi ser vîda gel re dibînin û got: "Ji dêvla şaredarên hatine hilbijartin, ji dêvla wijdana raya giştî peywirdarkirina kayûman xeflet û delalet e. Li cihê ku kesên bi hilbijartinê hatine bi hilbijartinê neçin yi wê derê ne demokrasî çêdibe ne jî serdestiya hiqûqê dimîne. Vîna gel ku ji sindoqê derketiye ne ew vîn e ku tune bê hesibandin. Ger hin pêşî li mafê hilbijartin û hilbijêrînê digire, divê em bi hev re dijî ev hêzên dij demokrasiyê derkevin, em mecbûr in xwedî li demokrasî û vîna neteweyî derên. Yên vî welatî bi rê ve dibin mecbûr in jiyana 82 mîlyonîn li vî welatî dijîn qebûl bikin, bi vî awayî mecbûr in welat bi rê ve bibin. Hemû dengên avêtine sindoqê, ew  deng dabin kî bila bidin ew wekî hev divê bêne qebûlkirin."

Îmamoglu diyar kir ku her kesê di sindoqê de hatiye hilbijartin xwedî heman maf û rayeyê ye, cuda dîtina wan nayê qebûlkirin, karek talûke ye, û ji peywirê girtina Şaredarên Bajarên Mezin ên Amed, Wan û Mêrdînê cudaxwazî ye.

Li ser pirsek Îmamoglu got ku li hemberî kayûman di çarçoveya hiqûqê de divê her kes têkoşînê bide, ev berpirsiyariya hemwelatiyê ye. Îmamoglu wisa got: "Ev ne tenê peywira partiya wan an hin kesan e. Li hemberî şaşiya hatiye kirin têkoşîn tê dayîn. Li hemberî vê divê em hemû rêyên hiqûqî bikar bînin. Li her qadê divê em bînin ziman. Azadî, aştî, demokrasî, komar ji bo me hebûyan nefes e. Me li Stenbolê dît çiqas nefesê me hatibû çikandin. Li bajarek mirov demokrasî saz bike ev nayê wê wateyê ku li hemû welat hatiye sazkirin. Divê li Mêrdînê jî, Wanê, jî Amedê jî, Stenbol û Îzmîrê jî hebe."

Şaredarê Bajarê Mezin ê Stenbolê Îmamoglu piştî daxuyaniya vir çû ser  gora Serokê Baroya Amedê Tahir Elçî yê li ber Minareya Çarling hatibû kuştin. Îmamoglu li vir dia kir û got: "Me xwest em şehîdê demokrasiyê yê ku serdestiya hiqûqê diparast bibîr bînin, li ser gora wî diayek jêre bişînin."

Dûre Îmamoglu çû Şaredariya Kayapinara Amedê û li vir ligel Hevşaredarê Amedê Dr. Selçuk Mizrakli û Hevşaredarê Mêrdînê Ahmet Turk hevdîtinek saz kir. Îmamoglu li vir got ku divê em vê pêvajoyê veguherînin firsendek û ev yek lê zêde kir: "Em dengê xwe ne ku radigihînin amediyan, em dengê demokrasiyê radigihînin stenboliyan. Li ev erdnîgariya ku 82 mîlyon kes lê dijîn divê em demoksariyê saz bikin. Min ji 16 mîlyon stenboliyan silav ji bo we anîn. Ez hêvî dikim dê dawî li vê neqiqûyê bînin. Tu fêdeya vê ji bo desthilatdarî jî nîn e. Fêdeya vê ji bo welat, ji bo milet nîn e. Gavek zûtir divê ji vê şaşiyê bi paş ve gav biavêjin. Neheqiya li we hatiye kirin li demokrasiya welat hatiye kirin."

Piştî daxuyaniya li ber çapemeniyê, çapemenî ji salonê hat derxistin û hevdîtina şaredaran li hundir dom kir.

Piştî devîtinê Îmamoglu ji bo beşdariya dawetek dê here Batmanê.