Diyarname
Di encama êrîşên hin nivîskaran de Rêxistina/Komeleya Nivîskarên Sûriyê endamtiya Helîm Yûsiv ji bo demekê da rawestandin.
Demek berê hem di çapemeniya ereb de û hem jî di medya civakî de êrîşên dijwar dijî nivîskarê kurd Helîm Yûsiv hatibûn lidarxistin. Çavkaniya êrîşan daxuyaniya 177 nivîskar û rewşenbîrên ereb û kurd bû, ku di bin navê biratiya ereb û kurdan de, hêzên kurdan yên çekdar û tevgera wan ya siyasî şermezar kiribûn û ew li kêleka çeteyên DAIŞ'ê û rêjîmê mîna hev nîşan dabûn. Helîm Yûsiv jî di medyaya civakî de dijî vê yekê derketibû. Li ser vê hin kesên nijadkurd giliyê wî li cem Rêxistina Nivîskarên Sûriyê kiribûn û ligel vê kampanya îmzeyan dabûn dest pê kiribûn û ji rêxistinê daxwaz kiribûn ku Helîm Yûsiv ji endametiya xwe derxînin. Wan Helîm Yûsiv bi nijadperestî, dijayetiya wî ya li dijî ereban û bervedêriya wî ya di ber hêzên kurd yên girêdayî rêjîma Sûriyê sûcdar kiribûn. Di encamê de, Rêxistin/Komeleya Nivîskarên Sûriyê di civîna xwe ya roja 09.07.2015'an de biryara rawestandina endamtiya Helîm Yûsiv da û ev yek di malpera xwe de ragihand.
Rêxistinê 9'ê mehê civîn çêkir û ji Helîm Yûsiv ligel ku endamê rêveberiyê ye jî xwest ku beşdarî civînê nebe; gotin ew dê li ser gengeşiya du aliyan bisekinin. Ji bilî vê gotinê tu daxwaz û fikir ji Helîm Yûsiv nekirine. Rêxistinê di daxuyaniya encamê de wisa got: "Di civîna xwe ya heftane de, ku di roja 09. 07.2015'an li dar ket, birêveberiya Rêxistin Nivîskarên Sûriyê biryara rawestandina endametiya hevkar Helîm Yûsiv, endamê birêveberiya Rêxistina Nivîskarên Sûriyê, girt. Hetanî lêkolîna di derbarê belavkirina agahiyên gelekî nehênî 'sirrî', ku di civîna birêveberiyê ya 02.07.2015'an de hatibûn gotûbêjkirin, bigihîje serî."
Di daxuyaniyê de qet qala êrîşan nake, sedema rawestandina endamtiyê tenê wekî tiştên tawanbarkirin nîşan dane û gotine: "Helîm Yûsiv tê tawanbarkirin bi belavkirina agahiyên nehênî -sirrî – yen civîna birêveberiyê." Lê daxuyanî nabêje ew agahî çi ne û çawa belav bûne.
**
Nûçeyên eleqedar:
- Nivîskarên 'kurd' çi ji Helîm Yûsiv dixwazin?
- Êrîşên li ser Helîm Yûsiv hat şermezarkirin