Diyarname

Nivîskar Edîb Polat romanek nû bi navê “Pênc Mifte û Wijdanek” derxist. Romana ku ji Weşanên J&J derket, di Fûara Pirtûkan a Amedê de gihîşt ber destê xwendevanan û Polat ji bo xwendevanan pirtûka xwe îmze kir.

Polat herî dawî di sala 2010’an de romanek pêşkêşî xwendevanan kiribû û niha bi romanek nû li pêşberî xwendevanên xwe ye. Çîroka vê romanê bingeha xwe ji derûnî û wijdanê kesayetan û dizî û şêlanên mezin digre. Ev yek wekî pirsgrêkek civaka me ye ku jêderka kirêtkirina karakterên vê romanê ye. Her wiha ev pirtûk, di dema salên 1970’î de, di şert û mercên Derbeya 12 Adarê de, jiyana Amedê radixe ber çavan. Wê demê têkiliya ermeniyên Amedê û kurdan, pêşnûmaya şêlanek mezin a zêrkerekî û banqeyekê, di bin tirsa rêveberiya leşkerî de hatiye zimên. Di vê romana aksîyon de sê karakterên sereke; kurdekî ji devera beriyê (M. Eliyê Nepen), xortekî Amedî ku jê re "Gedê Bajêr" jî tê gotin (Sêrdîn Çakmak) û miftevan û zêrkerekî ermenî (Agop Demirciyan) cih digrin. Şêlankerê mezin Eliyê Nepen e ku li sê welatan digere, li Rojava, Urdun û Bakurê Kurdistanê xwe vedişêre, plana şêlana banqeyekê dike, hêzên dewletê li pey xwe digerîne, Sêrdînê xebatkarê banqeyê dixapîne, mifteyên sexte dide çêkirin û şêlanê pêk tîne, lê Sêrdîn biwijdan e, dikeve qeyraneke saykolojîk... 

Heta niha 10 pirtûkên nivîskar Edîb Polat hatine weşandin.

- Pênc Mifte û Wijdanek / Edîb Polat / Roman / Wêşanên J&J / 2015 / 150 rûpel