Wan
Şaredariya Bajaroka Sixkê ya Wanê, bi minasebeta meha Remezanê, 'Şeva Dengbêjan' lidar xist.

Bername li Salona Çandê ya Vahdettîn Înan a Şaredariya Sixkê hate lidarxistin. Parlementerê DTP'ê yê Wanê Ozdal Uçer, Şaredara Sixkê Gulcîhan Şîmşek, rêveberên rêxistinên DTP'ê yên Wan û Bajaroka Sixkê, endamên meclisa Şaredariya Sixkê jî di nav de, piraniya wan jin bi sedan kes beşdarî şevê bûn.
Berî dengbêj derkevin dîwanê, Encumenê Şaredariya Wanê û mamosteyê zimanê kurdî yê berê Halît Hanay, der barê dîroka zimanê kurdî û giringiya zimanê zikmakî de axaftinek kir.
Hanay, diyar kir ku zimanê kurdî yek ji zimanên herî kevnare ye, lewre ligel asîmilasyon û çewsandinan jî, dîsa ev ziman winda nebûye. Hanay, da zanîn ku di vir de jî derdikeve holê ku ziman tunebe, netew jî ji holê radibe. Hanay, destnîşan kir ku heke gelê kurd ji hezaran salan heta niha li ser lingan sekinîbe, ev bi xêra serê parastina zimanê xwe ye. Hanay, anî ziman ku ji ber vê yekê mirov dikare bibêje ku ziman rûmeta miletekê ye.
Halit Hanay, li ser girîngiya parastina zimanê kurdî jî rawestiya û got: "Her zimanek reng û nirxekî xwe heye. Ziman bingeha çandê ye û raman jî bi zimanê dayikê pêş ve diçe. Ziman dema têk biçe netew jî têk diçe."

Piştî axaftina Hanay, ji hêla xebatkarên Navenda Çanda Mezopotamya (NÇM) ya Wanê ve, bilûr hate lêxistin.
Piştre Dengbêj Apê Elî û dengbêjên jin Behiye û Seîdê bi çepik û tilîliyan derketin ser dikê.
Dengbêj Apê Elî bi stranên xwe yên berê û strana xwe ya li ser bûyerên di Newrozê yên li Wanê demên hestewar dan jiyandin. Dengbêja jin Seîde jî, bi stranên xwe yên li ser jinan û Îmraliyê, eleqeyek mezin dît. Dengbêja jin Behiye jî bi strana 'Miho' ya bi nav û deng beşdar mest kir. Bername bi stranên gelekî û govendê bi dawî bû.

Ji DÎHA'yê hatiye girtin