Mêrdîn

Hîndekarê Zanîngeha Artûklû ya Mêrdînê Kadri Yildirim ji bo ji HDP'ê bibe berendam ji peywira xwe îstîfa kir. Yildirim li odeya xwe ya li zanîngehê ev biryara xwe ragihand çapemeniyê.

Yildirim berî berendamtiya xwe eşkere bike got ku dema ji Cîgiriya Rektoriyê îstîfa kiriye gotiye ewê nekeve nav siyasetê lê rayedarên HDP'ê ku bi pêşniyara berendamtiyê hatine lê jê xwestine li zanîngehê rola Kurdolojiyê xurtir bike. Yildirim diyar kir ku ligel rola beşa Kurdolojyê di warê aştiyê de lê hinan ev kar li wî û koma hevalên wî kirine wekî jehr, ev yek jî ne bes e xwendekarên ku ji bo MEB'ê gihandine ew jî ji ber kurdî hatine girtin, loma wî fikrê xwe guhartiye.

Par ji bo xwendekarên zanîngeha temam kirine wekî mamosteyên kurdî bêne peywirdarkirin xwendekaran dest bi greva birçîbûnê kiribû û li çadira ku têde bûn fîlmê derhêner Aras Koyî yê bi navê "Kurdistana min" temaşe kiribûn. Ji ber vê yekê bi îdîaya "propagandaya rêxistinê kirine" li 3 berendamên mamostetiya kurdî cezaya 10 meh a hepsê hate birîn. Yildirim li ser vê sekinî û got: "Bifikirin dewletek ji aliyekê ve ji bo selametiya welat bi serokê rêxistinê re hevdîtinan dike, li aliyê din heman dewlet sê kesên zanîngeha me temam kirine û dixwazin bibin mamosteyên dewletê bi sedema propagandaya rêxistinê ceza dike." Yildirim got ku ev nêzî sê mehan in li ser beşa Kurdolojiyê ya zanîngehê lîstikên tarî têne lîstin.

Prof.Dr.Yildirim got ku ger here meclisê ji bo pêvajoya aştiyê baş bimeşe dê bixebite. Yildirim got ji bo mebûsî îstîfa kiriye lê ger here meclisê jî dê beşa Kurdolojiyê bi tenê nehêle.

Yildirim li ser HDP'ê jî wisa got: "HDP ne tenê yê kurdan, partiya hemû gelên li Tirkiyeyê dijî ye. Ji ber vê yekê ji bo HDP xurtir bibe gere hemû gel û baweriyên li Tirkiyeyê dest bidin hev û wê derxin ser bendava hilbijartinê. Ev yek hem ji bo selametiya pêvajoyê, hem ji bo biratiya gelan û baweriya, hem jî ji bo Kobaniyên nû çênebin gelek girîng e."

Yildirim got ku HDP mafê misilmanên sunî, mafê elewî, êzîdî û yê hemû baweriyan diparêze, ya herî girîng jî Peymana Medîneyê ye ku partî vê yekê dipejirîne. Yildirim got ku ew wekî kesek ji medreseyan hatiye û îlahiyat xwendiye ji aliyê îslamî ve bûyîna berendamê HDPê tu pirsgirêkê nabîne, lewma ew bûye berendam.

Li gor biryara HDP'ê kesên bixwazin ji HDP'ê bibin mebûs ji 16'ê vê mehê heta 2'yê adarê divê serîlêdana xwe bikin. Prof. Yildirim ku niha îstîfaya xwe pêşkêş kir, dê hefteya pêşiya me ji bo pêşberendamtî serî li HDP'ê bide.