Diyarname
Weşanxaneya Nûbiharê ku di beşa klasîkan de heta niha gelek pirtûkên girîng weşandibû niha 4 hebên din li wan zêde kir.

'Dîwara Dahî'

"Dîwana Dahî" dîwara Mele Nezîrê Bedewî ye ku bi amadekariya Tehsîn Îbrahîm Doskî hatiye amadekirin. Latînîzekirina vê pirtûkê jî ji aliyê M. Xalid Sadînî ve hatiye kirin.
Mele Nezîr di sala 1933'yan de li gundê Ezîma bi ser Gercewsê ve ye hatiye dinê û di sala 1982'yan de li gundê Sêgiran a Heskîfê wefat kiriye. Di "Dîwana Dawî" de 129 helbest ku mijarên wan li ser evîn, meseleyên civakî û kurdîtiyê ne hatine weşandin.

"Qewlê Newala Sîsebanê"

"Qewlê Newala Sîsebanê" ji aliyê Ahmet Demir ve hatiye amadekirin û weşandin. Demir gotiye "Ev destan li nav kurdan gelek belavbûyî ye ku mamosteyê mezin Bedîuzzeman Seîdê Kurdî/Nûrsî, di Kulliyata Rîsaleyên Nû de qala vê destanê kiriye û pesna şêwaza helbestiya wê daye. Çêkerê dîmax û jîrtiyê, ewqas şiklê helbesta Qewlê Newala Sîsebanê diecibîne ku, kitêba xwe ya nav bi Lemaat di şiklê nezma vê destanê de dihûne." Li ser vê yekê Demir jî meraqa vê destanê kiriye û ew ji bo çapê amade kiriye.

"Dîwana Weda'î"

Weda'î ku di sala 1790'î de hatiye dinê dîwanek nivîsî bû. Ev dîwan niha bi navê "Dîwana Weda'î" ku vejandina wê Seîd Dêreşî kiriye hat amadekirin û çapkirin.
Pirtûk hem bi tîpên Latînî, hem jî bi yên Erebî hatiye çapkirin.

"Dîwana Hadî"

"Dîwana Hadî" ya Mela Mihemedê Liceyî ku Tehsîn Îbrahîm Doskî amade kiriye û M. Xalid Sadînî ew kiriye latînî. Berhema Mela Mihemedê Liceyî yek ji dîwanên kurmancî yên girîng tê jimartin ku li ser rengê klasîkî hatiye nivîsandin. Di dîwanê de hindik be jî helbestên bi zimanê erebî, farisî û tirkî jî hene.