Cemil Oguz

18'emîn Festîvala Şanoyê ya Stenbolê îsal 10'ê gulanê dest pê dike. Di festîvalê de digel gelek lîstikên balkêş û lîstikên li ser rojeva Tirkiyeyê, du lîstikên bi kurdî jî têne lîstin.

Yek ji festîvala herî girîng ya Tirkiyeyê Festîvala Şanoyê ya Stenbolê ye. Festîvala Şanoyê îsal di navbera 10 gulan û 5'ê pûşperê de li dar dikeve. Ji derveyî Tirkiyeyê 5, ji Tirkiyeyê jî nêzî 40 lîstik û komên dansê bi nêzî 100 lîstinan derdikevin pêşberî temaşevanên şanoyê yên Stenbolê.

Li 22 cihên cur bi cur lîstik dê bêne nîşandayîn, digel van jî komên şanoyên yên navneteweyî û komên dansê dê bi gotûbêj û atolye, konferans û pêşangehan rengek din bidin şanoyê.

Di festîvaleke wisa mezin de hebûna şanoyên bi kurdî ji bo şanoya kurdî gavek girîng e. Îsal şanogehên kurd di festîvalê de derdikevin pêşberî şanohezan. Ji van, Şanoya Bajarê Mezin a Amedê yekem car bi lîstikek xwe ya bi kurdî dibe mêvanê festîvalê. Her wiha Şanoya Avesta jî dîsa bi lîstika xwe ya bi kurdî dê derkeve ser dikê. Dîsa lîstika Tiyatro Arti bi lîstika xwe balê dikişîne ser kesên li Tirkiyeyê di bin çavan de hatine windakirin û vesazkirina xwe li ser Dayikên Şemiyê amade dike.

Vane lîstikên bi kurdî û hin lîstikên din ku ên me ji bo we hilbijartin:

ANTİGONE
Şanoya Bajêr a Amedê

Cih: Haldun Taner Sahnesi
25 Gulan, În, 20:30
26 Gulan, Şemî, 15:30
Nivîskar: Sophokles Sophocles
Lêanîn û Derhêner: Celâl Mordeniz
Wergera ji bo kurdî: Zana Kiliç
50 deqe; Bênavber.
Bi sernivîsa tirkî.

Şanoya Bajarê Mezin a Amedê ku di sala 1991'ê de dest bi karê şanoyê kiriye, bi salên 2000'î re ku şaredarî êdî ket destê BDP'ê (HADEP û DTP) dest bi lîstina bi kurdî jî kir. Bi vê awayê xwe li nav Şanoyên Bajêr de xwedî ciheke taybet e. Şanoya Bajêr a Amedê ku heta niha ji Tirkiye û derveyî Tirkiyeyê gelek lîstik derxist ser dikê vê carê Antîgone ya Sophokles derdixe ser dikê û bi vê lîstika xwe dibe mêvanê Festîvala Şanoya Stenbolê.
Antîgone dubendiya edalet û zagonê digire bin lêpirsînê. Çîroka Antîgone ku "Ne kîn, ji bo parvekirina hezkirinê tê dinê", di lîstikê de her karakter ji aliyê hemû lîstikên Şanoya BAjêr a Amedê ve tê lîstik û şirovekirin. Di lîstikê de her kes Antîgone, her kes Ismene, her kes Kreon e...

DAF
Tiyatro Avesta

Cih: Garajistanbul
3 Pûşper, Yekşem, 20:30
4 Pûşper, Duşem, 20:30

Nivîskar: Aydin Orak
Derhêner: Murat Garipagaoglu

60 deqe; Bênavber.
Bi sernivîsa tirkî.

Hema li ser sînoreke dinyayê du meşker; di dema nobedariyê de pevçûn-nîqaş, mayîn û mirinên wan dibin sedema sendromeke sînor: Sînoreke bê wate ku diparêzin. "Daf"a (Dahf, kêmîn) ku ji bo hinên din danîne. Her ku dem derbas dibe fêm dikin ku ev dafa di mejiyê wan bi xwe de ye...

Ez Bertolt Brecht
Dostlar Tiyatrosu

Cih: Kenter Tiyatrosu
23 Gulan, Çarşem, 20:30
24 Gulan, Pêncşem, 20:30

Lêanîn û Derhêner: Genco Erkal
Muzîk: Kurt Weıll, Hans Eıssler, Paul Dessau, Sarper Ozsan

85deqe; Bênavber.

Lîstika nû ya Genco Erkal "Ez Bertolt Brecht" ji aliyê lîstikvan û derhênerê navdar Genco Erkal ve ji helbest, stran û çîrokên Brecht hatiye sazkirin. Erkal ji bo îstikê dibêje "Bila vegera Brecht be"; dike mirov hin tiştan bibîne, asoya mirov fireh dike, bi pirsên dipirse dehf dide, hezkirina dil derdixe holê û Erkal dibêje: "Niha dema Brecht e!"
Di lîstikê de digel Erkal, Tulay Gunal temaşevanan dibin rêwîtiyeke bi coş a pergala nû ya dinyayê, mijara jinan û şer.
Di lîstika ku piyanist Yigit Ozatalay jî bi performansa xwe ya zindî beşdar dibe de muzîka lîstikê ji aliyê Kurt Weill, Hans Eissler, Paul Dessau û Sarper Ozsan ve hatiye çêkirin.

Nazim û Brecht hinek jî Aziz Nesin
NÂZIM İLE BRECHT BİRAZ DA AZİZ NESİN
Genco Erkal

Cih: Lutfi Kirdar Uluslararasi Kongre ve Sergi Sarayi
9 Gulan, Çarşem, 20:30

45’ deqe; Bênavber.

Lîstikvan Genco Erkal ji sala 1971'ê ve berhemên Brecht, ji sala 1973'yan ve ên Nazim Hikmet û ji 1975'an ve yên Aziz Nesin derdixe ser dikê. Niha bi vesazkirinên cuda van her sê nivîskarên mezin careke din derdixe rojevê. Bi rêya wan balê dikişîne ser pirsgirêkên roja îro.
Festîvala Şanoyê ya Stenbolê ji bo destpêka festîvalê pêşniyareke eşkere ji bo Erkal kir. Wî jî ev bikar anî û di şeva destpêkê ya festîvalê de dê bi hinek Brecht, hinek Nazim, hinek Aziz Nesin temaşevanan bi rêwîtiyeke muzîkal bibe dinyaya wan

Ne li cem me ye
BİZDE YOK
Tiyatro Arti

Cih: Mekan Arti
1 Pûşper, În, 16:00
1 Pûşper, În, 17:30
1 Pûşper, În, 19:00
1 Pûşper, În, 20:30
2 Pûşper, Şemî, 16:00
2 Pûşper, Şemî, 17:30
2 Pûşper, Şemî, 19:00
2 Pûşper, Şemî, 20:30

Nivîskar & Derhêner: Ufuk Tan Altunkaya

45’ deqe; Bênavber.

Tiyatro Arti li ser teknîkê cuda yên li ser dikê lêgerîna xwe didomîne.
Ew vê carê temaşevanan dixin nav vesazkirineke sîmulatîf, pêre temaşevan ji rastiyê dûr dikevin û xwe di nav vesazkirinê de dibînin. Lîstika ku dike binhişiya temaşekirinê biguherîne, temaşevan ji 'yê/a temaşe dike' derdixe û dike parçeyeke lîstikê. Lîstika "Ne li cem me ye", ji ser rewşa dîlgirtin, dîlbûn û sêbareya otorîte-hêz-qurban re mijara dîroka nêz a Tirkiyeyê digire dest. Lîstik balê dikişîne ser dîroka siyasî ya Tirkiyeyê û pêvajoya mafên mirovan, û vesazkirina xwe li ser Dayikên Şemiyê temam dike.
(Di her lîstinê de tenê 25 temaşevan dikarin lê temaşe bikin)

ANTONIUS û KLEOPATRA
Oyun Atolyesi

Cih: Oyun Atölyesi
1 Pûşper, În, 20:30
2 Pûşper, Şemî, 20:30

Nivîskar: William Shakespeare
Wergera ji bo tirkî: Bulent Bozkurt
Derhêner: Kemal Aydogan

125 deqe; 2 perde.

Kleopatra: Baş, ger bi rastî tu evîndar î, wê çaxê çiqas, ka wê bibêje.
Antonius: Eşqê ku bê pîvan eşqek reben e.
Kleopatra: Baş e, ger ez rabim bipîvim?
Antonius: Wê çaxê tu yê ji xwe re cîhanek nû bibînî.

Eşqa herî mezin a dîrokê eşqa Antonîus û Kleopatra ku bi rêzikên Shakespeare hatiye vegotin, ji sala 1947'an ve heta niha yekem car li Dika Oyun Atolyesî derdikeve pêşberî temaşevanan.
Lîstika "Antonius û Kleopatra" di navbera 26-27'ê gulanê de li Londona Îngilistanê beşdarî “Shakespeare’s Globe’s 2012" (Festîvala Navneteweyî ya Shakespeare" dibe û Tirkiyeyê temsîl dike. Piştî Îngilistanê lîstik tê li Tirkiyeyê di 1-2'yê pûşperê de derdikeve pêşberî temaşevanan. Di lîstikê de lîstikvanê navdar Haluk Bilginer û Zerrin Tekindor rola Antonius û Kleopatrayê digirin ser milên xwe.

Meymûna Kafkayê
KAFKA’NIN MAYMUNU
Young Vic Theatre Company

Cih: Kenter Tiyatrosu
19 Gulan, Şemî, 20:30
20 Gulan, Yekşem, 18:30

Lêanîn: Colin Teevan
Derhêner: Walter Meierjohann
Performans: Kathryn Hunter

60 deqe; Bênavber
Bi sernivîsa tirkî

"Meymûna Kafkayê" ji kurteçîroka "Raporek ji bo akademiyek" a Franz Kafka hatiye girtin. Lîstik ji monologa Meymûnek ku hînê axaftinê û hîn bûye wekî mirovek tevbigere pêk tê. Lîstikvan Kathryn Hunter ku bi gelek derhênerên navdar ên wekî Peter Brook re xebitiye, bi awayekî serketî çîroka hebûnê ya meymûnek ku dike bibe însan derdixe ser dikê.
Her kesek li nav civakê bi nasnameyên xwe yên guherbar re çawa dibe meymûn û hesta biyanîbûnê mijara bingehîn a lîstikê ye. Lîstika ku li kîjan welatî hatiye lîstin bi eleqeyeke mezin re rû bi rû maye, bi hevkariya British Council vê carê tê Stenbolê.

Kutlug Ataman: Projeya Taybet a Festîvala Stenbolê, Silsil

Cih: Dibistana Sereke ya Rum a Galatayê
12.05.2012
30.05.2012, 12.00-19.00

Hunermendê hemdem ê Tirkiyeyê Kutlug Ataman bi projeya taybet, bi "Silsel"ê dibe mêvanê festîvalê. Silsel bi aramî tê wateya daweşandina baskan. Silsel li bin esrexê xaniyên kevn ên suryanî yên li Mêrdînê dihatin çêkirin; motîfek çargoşe yê tîk bû ku bi rengê turkuaz dihat çêkirin. Li gor vegotinan, suryaniyên ku sji ber çewsandinên nediwêrin derkevin kuçeyan, li bin esreyên xwe ev motîf çêdikirin, bi vî awayî daxwaza xwe ya dîtina asîmanê hinek dianîn cih. Xanim Nasira ku li taxa suryanî ya Mêrdînê dijî ji bo Ataman qala vê çîrokê kiribû; û çîrok hêviya dîtina asîmanê ya li Anotoliya bi dîroka şîdetê tije tîne ziman... Ev proje jî bi awayekî hemdem, bi performansê dike ku asîmanê birêse.
Festîval ji bo vê performansê bang li beşdaran dike ku yên bixwazin bi awayekî beşdarî vê bibin, dikarin qumaşek 45 santîmetreyî bînin. Li ser vê qumaşê bi kîjan zimanî bixwazin daxwaza xwe binivîsin, yan jî resim bikin û ji wan re bişînin.
Kesên bixwazin ji berê de vê daxwazê ragihînin dikarin ji bo projeya Silselê bişînin vê navnîşanê:

İstanbul Tiyatro Festivali
İstanbul Kültür Sanat Vakfı
Nejat Eczacıbaşı Binası
Sadi Konuralp Caddesi No: 5
Şişhane 34433 İstanbul
T: (212) 334 07 76

Lîstikên ji Tirkiyeyê bilêtên wan di navbera 15-50 TL'yî de diguherin lê lîstikên biyanî buhaya bilêtan heta 180 TL'yî jî diçin.

Ji bo agahiyên berfirehtir:
http://tiyatro.iksv.org/tr