Batman
Fîlmên ku dê di Festîvala Fîlman a Yilmaz Guney ku Şaredariya Batmanê li dar dixe de bikevin pêşbaziyê hatin eşkerekirin.

Şaredariya Batmanê îsal 2'yemîn Festîvala Fîlmên Yilmaz Guney li dar dixe. Fîlmên ku dê bi hev re bikevin pêşbaziyê ji aliyê Wekîlê Şaredarê Batmanê Serhat Temel ve hatin eşkerekirin. Di dema pêşkêşkirina daxuyaniyê de Cîgirên Şaredar Mustafa Tugyildiz û Hamza Ayiş jî amade bûn.
Wekîlê Şaredarê Batmanê Temel got ku juriyê kurtefîlm û belgefîlmên ku ji wan re hatine şandin nirxandine, di encamê de 15 kurtefîlm ji bo yekemîniyê dê bikevin pêşbaziyê. Di warê belgefîlman de jî 10 belgefîlm dê di beşa pêşbaziyê de bêne nîşandayîn.
Festîval îsal di navbera 14-19'ê mehê de dê li dar bikeve û ji bo bernameya festîvalê amadehiyên wan didomin.

Temel bibîr xist ku di nav endamên juriyê de sînemagerên hêja ên wekî Sirri Sureyya Onder, Yuksel Yavuz, Nazmi Kirik, Seren Yuce û Sevilay Demirci hene û wisa dom kir: "Festîvala Yilmaz Guney ji bo evc bajar hinek bikevi rojevê, bi vê hesasiyetê me li dar xist. Par me ya yekemîn, îsal em duyemîn carê li dar dixin. Par tenê pêşbaziya kurtefîlman hebû, îsal hem pêşbaziya kurtefîlman, hem ya belgefîlman heye. Fîlmên bi ser bikevin dê roja 19'e sermawezê bêne xelatkirin."

Temel bal kişand ser çalakiya îro ku li Çelê li dar ket û got: "Hûn dizanin îro li Culemêrgê bûyera ku em xemgîn kirin li dar ket. Xeber tê ku 24 leşker mirine û 18 jî birîndar in. Vê yekê em xemgîn kiriye. Em li her platformê dibêjin ku divê êdî ev şer bi dawî bibe, pirsgirêka kurd bi rêya demokratîk bê çareserkirin û em di vê fikra xwe her tînin ziman.Bûyera îro pêk hatiye berê me dide gotinê ku em bi hêztir li ser aştiyê tiştinan bibêjin.  Rêya çareseriyê diyalog, axaftin û muzakere ye. Ji malbatên leşkeran re jî ez sebrê dixwazim."

Di beşên belgefîlm û kurtefîlman de dê berhem bi hev re bikevin nav qayişkêşanê. Vaye lîsteya berhemên ku dê bi hev re bikevin pêşbaziyê:

Belgefîlmên beşa pêşbaziyê:

- Heleçe - Derhêner Arkam Hidou
- Bêrîvan - Derhêner Aydin Orak
- Dayê Dibê Aştî - Derhêner Aziz Çapkurt
- Evdalê Zeynikê - Derhêner Bulent Gunduz
- Silo Qiz - Derhêner Bulent Boral
- Rewşen - Derhêner Cemil Oguz
- Bîstanê Zêrîn - Derhêner Seyda Goyan
- Be Wetan - Derhêner Hadi Sumer
- Wir Tragen Sutik - Derhêner Rindo Sur
- Camdan Kopruler - Derhêner Kibar Daglayan Yigit

Kurtefîlmên beşa pêşbaziyê:

- Olumun Rengî - Derhêner Aydin Orak
- Kesk - Derhêner Emin Dogan
- Bêdengi - Derhêner Aziz Çapkurt
- Ademin Kuyusu - Derhêner Veysel Cihan Hizar
- Cinawirê Torosê - Derhêner Firat Yavuz
- Piştî îlonê - Derhêner Ramazan Guneş
- Bark - Derhêner Omer Çakan
- Zamanın Avuçlari - Derhêner Ali Aktemur
- Perepara - Derhêner Bedirhan Sakçi
- Xewna Yusuf - Derhêner Ferit Karahan
- Ya Roj Di - Derhêner A.Rahman Baydemir
- Provasiz Goçer Hayat - Derhêner Rojda Şukran Karaş
- Sudan Korkan Adamlar - Derhêner Selim Akgul - Seren Gel
- Pera Berbangê - Derhêner Arîn Înan Arslan
- Ali Ata Bak - Derhêner Orhan İnce

***

Nûçeya eleqedar:

- Agahiyên nû li ser Festîvala Yilmaz Guney