Cemil Oguz
Dinya de henî derbî estê zehf muhîm ê. Derbî El Clasico înan ra yew a. Derbî Manchesterî zî dinya de yew derbiya pîl a. Eyro a derbî bîbî.

Bajarê Manchesterî eyro mawî û sûr bû. Manchester City (MC) bi formaya xwu ya mawî meydan de bî û Manchester United (MU) bi formaya sûre kerd bî meyman.

MU ke emsar rewşê cê baş nêbî la hîri maçanê peyînan ê deplasmanî de bi ser kewt bî. Waştê ene yewe qeybî serkewtişê xwu bişixulno, la hemberê MU de MC bîbî. Tîmêkew bîn nê, MC bi xwu. Bi De Bruyne, bi Foden, bi Haaland, Bernardo, bi Walker, Doku...

La reyna zî MU'y waşt siûdê xwu bişixulno. Şixulna zî. Hema deqe 8 bî, kaykerdoxê înan Marcus Rashfordî teberê sehay vernî qela ra fûzeyke eyşte. Perodayişêke mikemel bî. Her kesê maçe ra hes bikerê zî, nêkerê zî verê ene gole de eşkayne wirzê we serê lingan û silam bidê ci. Bî 1-0.

MU henî bîn zor da MC'yî. Heta deqe 25'î MU waştê maçe bigîro û qey ay joy kar kerd, la MC nêvindertê. Deqey 25 ra pey yew şûtê MU'y çinêbî. Nîmew yewîn ê maçe bi 0-1 qediya.

Nîmew diyin de MC tewr zehf hêrs bîbî. Çi rê nêbo? Cirê pûanî lazimî bî, cirê şampiyonî lazim a ke rekor bişkino. Deqe bî 56; Phil Foden veciya meydan. Pêlewanê MC'î bi qasê goley Rashfordî golêke weşe eyşte û bî 1-1. Maçe newera dest pa kerde. Erê newe ra dest pa kerde la MU meydan de çinêbî. Di nîmey diyin ê maçe de tenî yew şûtê MU zî çinêbî. Qeleparêzê MC Ederson kewt bî ra. Deqe 80'y de reyna Fodenî va "Ha, ez tiya wa" û encam berd 2-1.

MC hendî rehet bî. Stres şîbî, hame bî xwu ser. Deqe 90 temam bî, hakêmî 8 deqey bînî ro ci kerdî dergî. Haalandê ke 90 deqey de golê ke gere bi eyştê nêeşkabî berzo, xemgîn û bi stres bî, 90+1 de xwu efû kerd û maçe bi eno awa qediya: 3-1,

Enka, MC bi 62 pûanî rêza diyin de wo. Û Liverqool bi 63 pûanî rêza yewîn de wo. Hewtew vernî ma MC şino Liverpool. 10'ê aşme hîvey maçe bê...