Diyarname
Ji bo Fûara Pirtûkan a Stenbolê TUYAP'ê hindik ma. Weşanên kurd jî beşdarî fûarê dibin.
Fûara Pirtûkan a Stenbolê TUYAP îsal 29'emîn car li dar dikeve. Fûara ku wê 30'ê vê mehê dest pê bike û 7'ê sermawezê bi dawî bibe li dor 550 weşanxane û saziyên sivîl beşdar dibin. Di fûarê de wê li dor 300 çalakî li dar bikevin û bi sedan nivîskar jî pirtûkên xwe îmze bikin.
Heta niha di fûara de gotûbêjên li ser pirtûkan û wêjeyê li dar diketin îsal çalakiyên cihê lê hatine zêdekirin. Di nav van çalakiyan de îsal dê bi navê "Rengên Jiyanê" gotûbêjên rengîn li dar bikevin. Di van gotûbêjan de wê gotûbêjên li ser tenduristî, jiyan, pêşketinên şeşsî û çanda xwarinê bêne li dar xistin.
Mijara bingehîn a fûarê ya îsal "Nivîsandina Stenbolê" ye. Di vê çarçoveyê de wê çalakî jî bêne li dar xistin, li ser Stenbolê bê axaftin.
Mêvanê fûarê yê îsal Spanya ye û ji Spanyayê bi beşdariya nivîskaran dê di navbera 30 kewçêr-2 sermawezê de gotûbêj, pêşangeh û konsera dawî ya fûarê bê li dar xistin. Mêvanê rûmetê yê fûarê yê îsal jî Dogan Kuban e.
Di nav weşanxaneyên beşdarî fûarê dibin de çend weşanxaneyên kurd ên wekî Aram, Ava, Avesta, Deng, Lîs, Nûbihar û Perî jî hene. Ji bilî van Weşanên Evrensel ku ew jî carinan pirtûkên bi kurdî diweşîne jî li fûarê standê vedike.
Navê weşanên ku beşdarî fûarê dibin, nimreya salon û nimreya standên wan wisa ye:
ARAM: 2 605 B
AVA: 2 314 B
AVESTA: 2 413 B
DENG: 2 105 C
EVRENSEL: 3 311 A
LÎS: 2 314 C
NÛBIHAR: 2 609 B
PERÎ: 3 607 C
Di nav hemû çalakiyên li dar dikevin de tenê çalakiyeke weşanxaneyeke kurd li dar dixe. Weşanxanên Avesta bi navê "Ziman û Guherîna Civakî: Di xewnan de jî ezê zimanê xwe winda nekim" li dar dixe. Di çalakiyê de Sechu Sende wê li ser pirtûka xwe ya bi heman navî ku ji bo kurdî hatibû wergerandin û weşandin biaxive. Çalakî 7 sermawez, saet 14.30'î de li Salona Karadenîzê ye.
Ketina fûarê ji bo mamoste, xwendekar û malnişînan bê pere, ji bo kesên din 5 TL ye. Digel fûara pirtûkan di heman demê de Fûara Hunerê ya Stenbolê jî heman demê li dar dikeve.
***Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.