Diyarname

17’emîn Festîvala Şanoyê ya Navneteweyî ya Stenbolê bi merasimekê dest pê kir. Di merasimê de Xelata Rûmetê dan lîstikvan, derhêner û perwerdekar Erol Keskin.

Ji bo destpêkirina festîvala şanoyê li Salona Konserê ya Cemal Reşit Rey merasimeke hate li dar xistin. Di merasimê de Serokê ÎKSV’ê Bulent Eczacibaşi axaftineke kir, li ser salonên dîrokî ku têne girtin xemgîniya xwe anî ziman. Eczacibaşi wisa got: “Di vê festîvalê de wê lîstik li Girtîgeha Bayrampaşa ya berê jî bêne lîstin. Tişteke xweş e ku mirov cihên nû li cihên çand û hunerî dike. Lê di festîvala fîlman de me bibîr xist ku salona Sînemayê Emek tê girtin. Hêviya me ew e Emek careke din ji bo sînemayê vebe. Niha Navenda Çanda Ataturk (AKM) hê girtiye. AKM ji aliyê cihê xwe yê fireh, ji aliyê teknîkê ve wekî nîşaneya çand û hunerê ya Stenbolê ye. Ez hêvî dikim ev der dê di demeke nêz de vebe, 2 sal paşê di festîvala şanoyê de, ne xemgînî, em kêfxweşiya xwe bînin ziman.”

Xelata Rûmetê dan Erol Keskin

Di şevê de plaket pêşkêşî sponsoran hatin kirin û dûre jî xelata rûmetê hate dayîn. Xelata Rûmetê ya îsal dan Erol Keskin.

Erol Keskin di ciwaniya xwe de dest bi şanoyê kiriye, dûre di Şanoya Dormen û Şanoya Bajêr a Stenbolê de karê xwe domandiye, di nav avakarên Labaratoara Lêkolînê ya Şanoyê di cih girtiye, di lîstikên navdar ên wekî “Oppenheimer Olayi”, “Galileo Galilei”, “Kral Lear”, “Gazete-Gazete” de lîstiye. Ew hem lîstikvan,hem derhêner û hem jî perwerdekar e. Keskin ku bi çepikên mezin derket ser dikê xelata xwe ji destê Eczacibaşi girt.

Festîvala duyeman Xelata Rûmetê ya îsal jî wê bide derhêner, perwerdekar û nivîskarê japonî Tadashi Suzuki. Suzuki xelata xwe 26’ê mehê saet 20.30’an de berî lîstina lîstika “Elektra” wê li Sahneya Muhsin Ertugrul a Harbiyeyê bigire.

Merasima vekirina şanoyê bi lîstika Engin Alkan a bi navê “Hekate’nin Şarkisi” dest pê kir. Lîstika ku li ser metin û helbestên Shakespeare hatiye sazkirin, stranbêj, lîstikvan û dansvanan rêzikên Shakespeare şirove kirin.

90 lîstik hene

Îsal di festîvalê de ji derveyî Tirkiyeyê 9 şano û komên dansê tên. Nêzî 30 lîstik, dans, performans û nîşandayînên taybet wê bêne pêşkêşkirin. Di 18 cihên cur bi cur de bi giştî li dor 90 lîstikê wê derkevin pêşberî temaşevanan.

Di festîvala ku wê heta 10’ê pûşperê li dar be de bi mêvanan re xebatên gotûbêj û yên atolyeyan jî wê li dar bikevin.

***

Foto: Cemil Oguz

Nûçeyên eleqedar:

- Bernameya Festîvala Şanoyê hate pêşkêşkirin