Diyarname

17’emîn Festîvala Şanoyê ya Navneteweyî ya Stenbolê îsal di navbera 10 gulan- 10 pûşperê de li dar dikeve. Di festîvalê de yekem car lîstikek bi kurdî jî heye.

Li navenda ÎKSV’ê bi beşdariya Serokê Lijneya Rêveberiyê ya ÎKSV’ê Bulent Eczacibaşi, sponsorên festîvalê li ser navê Aygazê Midûrê Giştî Yagiz Eyuboglu û li ser navê Opetê midûrê Giştî Cüneyt Ağca û Dîrektora Festîvala Şanoyê ya Stenbolê Prof. Dr. Dikmen Gurun civîneke çapemeniyê hate li dar xistin.

Di civînê de Eczacibaşi bal kişand ser Stenbole ku Paytexta Çandê ya Ewropayê ye, da zanîn ku ji bo vê ew zêdetir li gelek cihên bajar çalakiyên li dar dixin. Eczacibaşi diyar kir ku heta niha wan li aliyê Ewropayê ya Stenbolê çalakiyên şanoyê li dar dixistin di vê festîvalê de em li aliyê Anatoliyê jî çalakiyan li dar dixin.

Bulent Eczacibaşi wisa got: “Şano dike ku civak bi çaveke din li xwe binêre, jiyana ku lê dijî bi awayekî din bibîne, dest dide beşên din ên hunerê û kifşên nû, awa û şiroveyên nû derdixe holê. Em dilgeş in ku piştgirî didin vê yekê.”

Piştî axaftinan dîrektor Gurun bernameya şanoyê eşkere kir. Di nav bernamaya 17’emîn Festîvala Şanoyê ya Navneteweyî ya Stenbolê de îsal ji derveyî Tirkiyeyê 9 komên şano û dansê û nêzî 30 lîstik, dans, performans û pêşandanên taybet ên ji Tirkiyeyê yekem car wê derkevin ser dikê. Di çarçoveya festîvalê de li 18 cihên cur bi cur wê 90 çalakiyên cur bi cur bêne pêşkêş kirin. Digel van gotûbêj û xebatên atolyeyan wê li dar bikeve.

Îsal ji ber ku “Li Tirkiyeyê Sala Japonan” e wê sê lîstikên japonan jî bêne pêşkêş kirin.

Xelata rûmetê

Festîval her sal xelatên rûmetê dide. Îsal ji ber keda wî wê xelata rûmetê bidin lîstikvan, derhêner û perwerdekar Erol Keskin û derhêner, perwerdekar û nivîskarê japon ê navdar Tadashi Suzuki. Erol Keskin di 10’ê gulanê roja duşemê di merasima destpêka festîvalê de wê xelata xwe bigire. Suzuki jî roja 26’ê gulanê sait 20.30’yan de bi pêşkêşkirina lîstika xwe ya bi navê “Elektra” de wê xelata xwe bigire.

Cihên çalakî li dar dikevin

Çalakiyên festîvalê îsal li 18 cihan li dar dikevin. Girtîgeha Kevn a Bayrampaşayê, Navenda Çanda Caddebostan, Salona Cemal Reşit Rey, Çiplak Ayaklar Dans Studyosu, Garajistanbul, Sehneya Haldun Taner, Sehneya Harbiye Muhsin Ertugrul, Kumbaraci50, Lutfi Kirdar Uluslararası Kongre ve Sergi Sarayi, Navenda Pêşandan a Zanîngeha Sabanci, Salon, Semaver Kumpanya Çevre Tiyatrosu, Ses Tiyatrosu, Sehneya Şişli Cevahir, Talimhane Tiyatrosu, Tiyatro Pera, Sehneya Tekelê ya Uskudarê û sehneya Uskudar Studyoyê wê ji bo çalakiyên şanoyê mazûvanî bikin.

Hin lîstikên li şanoyê

Ji Almanya, Avusturya, Belçika, Hollanda, Îngilistan, Îtalya û Japonyayê komên şanoyê tên Stenbolê.

“ŞEYTANİ KOMEDYA – JOHN MALKOVICH’LE PODIUMARTISTS”
Ev lîstik ku John Malkovich serlîstikvaniya wê dike li Ewropayê deng veda. Lîstik ser çîroka qatil Jack Unterweger ê li hemberî nivîskar, helbestvan û jinên avusturyayî ye. John Malkovich, karakterê bi navê Unterwegerê ku di sala 1974’an de tê girtin piştî salan ji ber ku baş bûye tê berdan lê piştî demekê dîsa dest bi kuştina fahîşeyan dike û tê girtin, di dawiyê de jî întîxar dike dilîze.

DAVA (DOZ)– MÜNCHNER KAMMARSPIELE
Derhênerê alman Andreas Kriegenburt lîstika “Doz”ê ji romana Franz Kafka girtiye û pêşkêş dike.

CINECITTA APERTA – VOLKSBUHNE AM ROSA-LUXEMBURG-PLATZ
Nivîskar û derhêner Rene Pollesch di sêbareya Rihî de beşa diduyan a “Cinecitta Aperta”yê pêşkêş dike. Cinecitta Aperta bi vegotina xwe ya polîtîk a xurt, bi teknîka xwe ya balkêş û dîtbariya xwe balê dikişîne.

Lîstikvan bi kurdî: Nora

Yekem car lîstikeke şanoyê ya bi kurdî di nav bernameya festîvalê de cih digire. Tiyatro Boyali Kuş ku dehemîn salvegera xwe pîroz dike lîstika “Nora/Nûrê” bi kurdî pêşkêş dike. Lîstika ya Henrik Ibsen ku bi tevgera azadiya jinan re bûye yek lîstikek bi kurdî ye. Derhênera lîstikê Jale Karabekir e û lîstik ji aliyê Aydin Orak ve ji bo kurdî hatiye wergerandin. Lîstik bi şiroveyeke femînîst a hemdem tê pêşkêş kirin.

Ji bo 150’emîn salvegera bûyîna Anton Çehov de sê lîstikên cihê yên Çehov di festîvalê de têne pêşkêş kirin. Lîstika “Xalê Vanya”, “Piyano” û “Qaqlîbaz” wekî sê lîstikên Çehov di festîvalê de derdikevin ser dikê.

Lîsitkvan Derya Alabora bi Tiyatro Grup ku wê ava kiriye ji metna orjînal a Shakespeare ketiye rê û lîstikeke bi navê “Firtone” dikeve dinyaya bi sêhr û muzîkal. Derhêner Serdar Biliş ku li Îngilistanê nav daye û sê lîstikvanên jin wê “Firtone”yeke cihê ji Shakespeare pêşkêş bikin.

Lîstikvan û derhênerê navdar Genco Erkal jî li ser Nazim Hikmet lîstikek pêşkêş dike. Lîstika bi navê Wekî Kerem: Digel Nazim Hikmet 35 sal” careke din balê dikişîne ser helbestvanê navdar.

Yek ji lîstikên ku diyar e wê balê bikişîne jî “Son bir kez” (Cara dawî) ya lîstikvan Mahir Gunşiray û Tiyatro Oyunevî ye. Lîstik ji aliyê Asli Erdogan, Bejan Matur, Beliz Guçbilmez, Ece Temelkuran, Murat Uyurkulak, Şamil Yilmaz, Umit Kivanç ve hatiye nivîsandi.

Roja 3’yê avrêlê wê dest bi firotina bilêtên festîvalê bikin. Îsal buhaya bilêtên festîvalê di navbera 10 – 150 TL’yî de ye.