Ferhad Girêşêran
Zilm û zordariya li ser jinê li rojhilat êşeke giran e. Her çiqas ku mirovahî bi pêş de dihere û cîhan diguhere jî jin hîna jî bindestiya xwe neşkenandiye. Li rojava piştî têkoşîneke demdirêj jinan azadiya xwe bi dest xistin û di her warê jiyanê de cihê xwe girtin. Li welatê me jî û li Tirkiyeyê jî jin rastî gelek neheqiyan tên. Ji bo “namûs”ê têne kuştin. Di hinduran de dîl têne girtin. Ji hezkiriyên xwe tên bidûrxistin û bi kalên heftê salî re têne zewicandin. Ji bav, bira û mêrên xwe lêdanê dixwin.Di nava civakê de nikarin rihet tevbigerin û di warê xwendin û xwe bi pêşde xistinê de jî têne asteng kirin.
Cihê pirsgirêk lê hebin teqez ewê huner jî lê hebe. Huner ji ber pirsgirêkan ferz dibe. Û huner ew pirsgirêkana li nava çavên mirov dixe. Ji ber ku li cem me jî pirsgirêk pirin diviyabû huner li cem me weke bizrê kulî pir bûya. Lê dema em pirsgirêkan û asta hunerê didin ber hev ev teza me derew derdikeve. Hilbet gelek sedemên vê yekê hene. Em dikarin bêjin ku ji ber zilm û zordariya li ser serê me em nikarîbûn rihet tevbigeriyana û hwd. Lê di van demên dawî de her çiqas ku zarokên çarde salî ji ber ku Kurdin têne kuştin jî zilm û zordarî piştî tekoşîna bi salan mecbûr ma sist bibe û divê ji niha û şûnde em Kurd bi hunera xwe karibin pirsgirêkên xwe bi riya hunerê li nava çavên civakê bixin.
Destar teatre, îsal lîstika Reşê Şevê ku Berfin Zenderlioglu û Mîrza Metin pevre nivîsandine bi derhêneriya Mîrza Metin pêşkêşî şanohezan dike. Min jî di 23yê kewçêrê de li ser dika Su Gösteri Sanatları li lîstika wan temaşe kir. Lîstikê ji bo pêşeroja şanoya Kurdî hêviyên min geş kir. Temaşevanan hêwan tije kiribûn û li hêwanê cihek vala jî nemabû. Ev jî nîşanî me dide ku dema xebatek profesyonel û reklamek baş çêbibe ji bo şanoyê hertim temaşevan hene. Dekorên lîstikê Metin Çelik amade kirine û ez dikarim bêjim ku dekoran gelekî li lîstikê kiribûn. Em werin ser lîstikvanan Berfin Zenderlioğlu bi karaktera Gulîzer xwedî performansek başbû. Lîstik li ser wê hatiye sazkirin û bi piranî li ser dikê tenê ye ev jî dike ku bi tevger û gotinên xwe bala temaşevanan her zindî bihêle. Gulîzer li ser dikê bi ereboka xwe ya pê kaxiza berhev dike dikeve dirbê gelek jinan. Di vî karî de jî gelek serkeftî ye. Dengê xwe gelek baş bikar tîne û bi kurmanciyeke gelek şêrîn dipeyive. Ji bilî Zenderlioğlu du lîstikvanên din jî hene,ew jî Mensur Zîrek û Selman Akkuş in. Zîrek û Akkuş jî bi dans û rîtma xwe rengek xweş didin lîstikê.
Lîstik li ser êşa jinan bi tevnek xweş hatiye hûnandin. Di kesayetiya Gulîzera cinî de êş û kedera gelek jinan radixe ber çavên me. Di ber re jî balê dikşîne ser rojevê û li hember kuştina Ceylanan dengê xwe radike. Bi pirsa “mirov çawa li mirinê temaşe dike” mirov dihejîne.
Destar teatre,îsal cara ewil ji Wezareta Çandê ya Tirkiyê 21 hezar TL alîkarî stendiye. Cara ewile ku vê alîkariya didin şanoyeke Kurdî. Wezareta Çandê hersal ji bo xebatên şanoyê alîkarî dide komên taybet lê heta niha nedida komên Kurdî.Taybetiyek lîstikê jî weke jorenivîs axaftin bi Tirkî jî derbas dibûn.
Ji ber xebat û performansa Destar Teatre ez hemû endamên komê pîroz dikim. Ji bo pêşeroja şano û hunera Kurdî hêviya mirov geş dikin. Heke we li lîstikê temaşe nekiribe pêşniyara min li we herin li lîstikê temaşe bikin.
***
Nivîsên Ferhad Girêşêran ên ku berê di Diyarnameyê de hatine weşandin:
- Panaz*
- Huner û Ziman: Li ser lîstika “Lewheyên Bêmane” çend gotin