Hekîm Sefkan / Tava Heyvê

Piştî 6 salan dem baş
Rojev germ e, mijar pir in. Malper hesanin, nivîskar zêde ne. Belkî yek bêje; Ma ku nivîskar zêde ne, çima wê demê em hinek navan di deh malperan de dibînin?
Bersiv jî ev e herhal: "Mijar pir in"...
Ji mêj ve Cemîl û Dawud ez vexwendeyî malbata Diyarnamê kirim, bêguman ez gelekî kêfxweşbûm, incex min soz dabû ku heya ji min bê ezê di malperan de nenivisînim-sedemên wê jî, rojên pêş ezê diyar bikim- lê dîsa min got ku nema ji min hat ez xwe bigrim û bivê ku binîvisînim, wê demê ezê tevlî kerwanê Diyarnamê bibim.
Û va ez  hatim...
Ez hêvîdarim ku ezê paya Diyarnamê nizm nekim, ku xwedêneke, bû yê ku bilind bikin pir in...
Erê ez ji we venaşêrim -ku bikim jî nabe- yên hayedar zanin ku ev 6 sal in ez ji medyayê dûr im. Her hinek û li gorî xwe vê mijarê şîrove dikin -ji hinekan re jî ne bûye pirs û ne jî li bersivê geriyane- ya herî baş ew dikin.
Îca ez zuha nebûme, hela hîn rewa di min de heye, yanî ne wekî ku hinek kes difikirin ku ez bayek bûm hatim û çûm...
Wekî ku deng ji têla tenbûra doza kurd tê ezê jî li ber dîlanê bikim, ev sozeke ne tiştekî din e.
Erê, di van 6 salan de ez rastî gelek tiştan hatim, lê di gotara yekemîn de ez naxwazim mijareke sereke bigirim destê xwe, bila wiha bela wela be.
Rojên pêş ezê hewl bidim ku li ser mijarên hunerî hinekî xwe qure bikim, belkî fêdekî min bigihêje derdoran, ku fêde nebe jî, ez sedî sed bawerim ku wê zerar bigihê hinekên din, ew jî baş e.
Çima Diyarname?
Min heta niha ne Cemîl dîtiye ne jî Dawud ne jî hevalên din ên di malperê de kar dikin, lê min malper xwendiye û dixwînim. Hinek tiştan bala min kişand, wekî; Di gelek malperan de mirov rastî heman navan tê, lê ew li vir tunene, ev cihê kêfxweşiyê ye. Ya din û di nêrîna min de ku pirensîbeke pîroz e, Diyarname dijminatiya tu hêz û kesayetiyan nake, ji ber van û ji ber sedmên din mirov dikare bixwîne bêyî ku mîda mirov li hev keve yan jî enternet li ber çavê mirov reş bibe.
Vê carê bila wiha kin û bela wela be, ez dizanim ku hûnê komî serhev û  dirêj bikin.
Heya nivîseke din, li benda nerînên we me.

hekimsefkan@hotmail.com