Kozakli navçeyeke Nevşehîrê ye. Li herêmeke turîstîk e. Zêdetir bi germava xwe navdar e û her sal bi deh hezaran însan diçin wê derê. Hinek ji bo kêfê ku dikevin ava germ, hinek ji bo dermankirina hin nexweşiyên xwe...
Serjimariya navenda navçeyê 7300 kes e. Hotel-motel têde bi giştî cihê 7700 kesî hene. Vê Cejna Remezanê de ev hotel-motel sedî sed tijî bûn. Ew serjimariya Kozakli derketibû ser 15 hezar kesî. Ez jî yek ji wan bûm.
Kozakli li Tirkiyeyê yek ji wan navçeyên serekeye ku lê betalî nîn e. Jê wêdetir ji bajarên derdorê kes tên li wê derê dixebitin.
Kozakli bi taybetiya xwe wekî navçe û bajarên Anadoliya Navîn her dengên xwe dide partiyên nijadperest an jî yên muhafezekar. 5.101 hilbijêrên Kozakli hene. Di hilbijartina herêmî ya 2009'an de berendamê AKP'ê Erdogan Çelik bi 1884 dengan bi ser ket. Yusuf Polat ê berendamê MHP'ê bi 1774 dengan bû duyemîn. Yê CHP bi ser 500'î re deng girt û bû sêyem. Di hilbijartina herêmî ya 2014'an de gelê wê derê yên CHP û MHP'ê bi hev re kar kirin. Gelek CHP'yî ji bo berendamê MHP'yî Celallettin Guven xebitîn. Di encamê de Guven ê MHP'yî bi 2723 bû şaredar, şaredarê berê yê AKP'yî Erdogan Çelik di 2051 dengan de ma. Em bên ser meseleya sernavê: Di vê Kozakliya MHP'yî de çawa li Berendamê Serokomariya Tirkiyeyê Selahattin Demirtaş dinêrin?
Saet li dor 21 e, ez û hevlingê (bacanax) xwe em dê herin dondirmeyê (bestenî) bistînin. Ji dikanekî em dikevin hundir, ji yek carî re ez ji xalo (temenê wî bi ser 60'î re) dipirsim û diyalogek wisa derdikeve holê:
- Dondirmeyê Algîda heye? Ka tu Algîda didî me yan yê li vir we amade kiriye em bistînin?
- Algîda yê Îsraîlê ye, ez vê bidim we (dondirmeyê ku ew bi xwe çêdikin nîşan dide)
- Wê çaxê tu çima difroşî?
- Ne ê Îsraîlê tenê, Hollanda û Fransa jî şirîk in.
- Ma çi ferq dike. Tu zanî, Apê Tayyip jî radibe diruşman diavêje dijî Îsraîlê. Wisa be tiştên wan nefroşin!
- Îsraîl mirovan dikuje...
Ez hinek din aciz dibim:
- Ji min re qala tiştên wisa neke. Belê her kes komkujiya Îsraîlê şermezar dike. Lê hûn, ên ku qala vê yekê hûn çima tiştên wan difroşin? Kesî nexapînin. Tu dizanî çiqas têkiliya aborî ya Tirkiye û Îsraîlê heye? Ez ji bo te bibêjim: 2 mîlyar dolar... Piraniya vê jî têkiliya dan û standina amûrên leşkeriyê ye. De fermo, ka em çawa bikin...
Helbet zilam huş dibe, lê ez mijarê diguherînim: "Niha Apê Tayyip ew qas diruşman davêje ji bo dengirtinê, tu dibêjî dê bi ser bikeve?"
- Belê, sedî sed.
- Di dora yekem a duyem de?
- Ya yekem de.
- Lê dengên MHP û CHP'ê sedî 46 û tiştek dikin, partiyên din jî hene, çawa dê dora yekem de Tayyip bi ser bikeve? Dîsa ew Ekmeleddin dibêjin baştir e, zana ye, profesor e. Ma xelk dê deng nedin wî?
Xaltiyek di temenê wî xaloyî de, li aliyê paş e, diyar e jina wî ye dikeve nav sohbetê:
- Erê lê kes deng nade wî.
- Çima?
- Her kes dide Tayyip.
- Hûn jî?
- Erê.
- Zilamekî bi navê Selahattin Demirtaş jî heye, dibêjin ew jî berendam e û xweş xeber dide. Ma ew ê qet dengan negire?
(Piştî em vedigerin hevlingê min dibêje, te wisa got, wekî ku tu qet wî nas nakî, hindik mabû ez bikenim, min xwe bi zor ragirt)
Xaltî dibêje: Belê xweş diaxive lê ew nikare bi ser bikeve.
- Ew wekî mirov baş jî dixuye ne?
Xalo dibêje: Erê rast e, lê hêza wan tune ye. Tenê dê kurd dengan bidin wî.
- Wa, tu dibêjî wekî din dê dengan negire?
- Na.
- Ma te hê got, baş diaxive...
- Erê lê ji aliyê dengan ve mesele cuda ye. Em didin ê xwe. Li vir kes deng nade wî.
- Li Kozakli qet kes dê deng nede wî?
- Li vir hin kurd hene, belkî ew bidin.
Xaltî jî heman gotinê dubare dike.
Belê li navçeyeke ku di destê MHP'ê de ye rewş ev bû. Bi rêya TV'yan re Demirtaş hewayeke erênî gihandiye wir jî lê ji aliyê dengan ve hê mesele nehatiye wê astê.
Em ji dikanê derdikevin.
Di pênc rojên ez li wir mam de, li cafeyan guhên min vekirîbûn, nêrînên wisa wekî li jor hebûn, lê li her derê her kes bi partiya xwe ve girêdayî ye. Guhartina vê yekê jî wisa hêsan naxuye.
**
Wekî notek: Êvara 4'ê mehê lêkolîner Adil Gur di CNNTurkê de qala serketineke baş a Demirtaş dikir û digot: "Ji ber qedexeyê em nikarin encaman eşkere bikin. Lê roja çarşemê (qala 6'ê vê mehê dike) anketa dawî ku me çêkiriye dê weşaneke biyanî biweşîne. Emê jî bişopînim.
.jpg)
.jpg)
.jpg)
