Pêşî bibêjim, tiştên ku ezê niha li vir bînim ziman nayê wê wateyê ku divê HDP li ser xwe bi awayekî xurt nirxandinê neke û li çareyan negere.
Piştî vê kurtegotinê;
Belê bi ya min HDP serketî ye.
Ez xal bi xal rêz bikim:
- Li Tirkiyeyê "Milli Goruş" di sala 1969'an de dest pê kir. Ev 46 sal in û ev 21 sal in jî (ji dema Şaredariya Stenbolê ve) desthilatdar e. Û ev 13 sal in jî hemû derfetên dewletê ligel rêxistinên din ên olî parve dikin û dixwin. Di 7'ê pûşperê de ji ber xwarin, dizî û tiştên din hinek li hev ketibûn, vê carê wan rêxistinên olî careke din di bin banê AKP'ê de li hevkirinek pêk anî.
Hemberî van rêxistina tevgera kurd piştî salên 70'yî derketiye holê lê ji derfetên dewletê bêpar. 1'ê sermawezê bi vî awayî li dar ket, mirov AKP û HDP di van çarçoveyan de dikare binirxîne û hin tiştan bibêje. Emê jî wisa bikin. Loma em dibêjin HDP serketî ye.
Em bidomînin:
- Li Tirkiyeyek ku partiya desthilatdarî her cure tiştî (şer, girtin, pere, çapemenî, tehdîd, aborî û hwd) ji bo serketina xwe bikar tîne de li ser lingan mayîn bi xwe serketinek e. Hem ji ber vê, hem jî ji ber HDP'ê dengên partiya siyasî ya vê tevgerê ji asta 5-7'an derxist bi ser 10'î loma serketî ye. Êdî pirsgira tevgera kurd a bendava hilbijartinê nîn e. Pirsgirêka "van dengan dikare çawa bilindtir bike" heye.
Bandora çapemeniyê
- Li Tirkiyeyê û li Bakur her kes çav li çapemeniyê ye û çapemenî gelek bandorê li mirovan dike. Ji bo serketina mezin derket holê ku divê çapemeniyeke te ya mezin hebe. TRT jî di nav de 12 kanalan di 25 rojan de 138 saet cih daye Erdogan, 238 saet cih daye AKP'ê (bi giştî 376 saet). 36 saet cih dane CHP'ê, 21 saet cih dane MHP'ê û tenê 6 saet cih dane HDP'ê. Ligel ew qas cih dane AKP'ê û çapemeniya AKP'ê di her saet û kêlî de ji bo HDP dakeve bin bendavê weşan kir, lê di encamê de HDP'ê tenê 2 pûan winda kirin. Loma ligel vê bêedaletî jî ew qas deng girtin HDP'ê dikare serketî bê nîşandan. Ha, li vir çapemeniya kurd jî dikare xwe bide bin lêpirsînê ka çiqas bandor kir, çiqasê din divê bike...
Xala din, vê carê çapeminiya mezin a Tirkiyeyê qet cih neda HDP'ê (ku ev yek eşkere gotin jî) kir ku aliyê rojavayê Tirkiyeyê guhê ku di 7'ê pûşperê de ji bo HDP'ê vekiribû bigire, yan jî bi aliyê din de bade.
Rojavayê Tirkiyeyê
- Bi awayekî xurt venegotina "Tirkiyeyêbûnê" ku bala gelek tirkên rojavayê Tirkiyeyê dikişand vê carê li aliyê rojavayê Tirkiyeyê hem eleqeya ji bo HDP'ê kêm kir, hem jî deng. Lê berevajî vê yekê her çiqas li hin bajaran deng hatibin windakirin jî nasnameya wê ya kurd xurtir kir. Ev erênî ye.
Xweseriya 12 bajar dîsa hat erêkirin
- Li gor vê, li 12 bajaran HDP bûye yekemîn û HDP'ê nîşan da ku li van 12 bajaran êdî ev yekemînî naguhere. Ev yek meseleya xweseriyê careke din tîne rojevê. Li van 12 bajaran dema referandumek ji bo xweserî bê kirin li van 12 bajaran qebûlkirin sedî sed e. Ev yek jî serketinek e.
Dengên metropolan
- Qîmeta dengên metropolan careke din derket holê. Ger li Tirkiyeyê siyaset bê dewamkirin bi qasî Amedê Stenbol, bi qasî Wanê Îzmîr, bi qasî Mêrdînê Enqere girîng e. Bi temamî nebe jî ligel her tiştî parastina dengên li metropolan serketinek e. Dema pêşiya me diyar e xebatek mezin ji bo vê yekê jî lazim e.
Gelo şer êdî bandorek neyînî dike?
- Şerê li Kurdistanê tirs xist dilê aliyê rojavayê Tirkiyeyê û vê yekê bi awayekî neyînî xwe nîşan da di warê dengan de. HDP'yiyan hewl da xwe ji bo guhartina vî fikrî lê têr nekir. Hat dîtin ku dema şer hebe rojavayê Tirkiye ji HDP'ê dûr dikevin.
Meseleya îtîfaqan
- Ji aliyên beşdarên nava HDP'ê ve jî nîqaşek heye; îtîfaqa ligel elewiyan yan suniyan... Îtîfaqa ligel çepgiran û hwd. Bi ya min tevger divê xwedî li elewiyan jî derê, li suniyan jî. Ji her du derdoran jî di dema pêşiya me de divê nûner têde cih bigirin. Bila Altan Tan jî hebe, Muslum Dogan jî hebe. Her yek fikra wî, rexne û nêrînên wî cuda bin jî bila; ew jî parçeyek vî gelî, parçeyek vê tevgerê ne û divê ji niha û pêde jî hebin.
Ji bo çepgirên Tirkiyeyê jî; Gere ew jî di navê de bin lê ne hewceye parçeyek dîreksiyonê di destên wan de be. Dengeyek wisa baş bê sazkirin dê pêşeroj baştir be. Tiştek zehmet e van hemûyan di nav heman cihî de bê girtin, lê girtina wan bi xwe serketin e.
Meseleya Kurdistanê
- Serdema pêşiya me dê meseleya Kurdistanê (bi Başûr û Rojava ve jî eleqedar) zêdetir bibe meseleya nîqaşê. Bakur ev firsend bi serketina 12 bajaran da HDP'ê ku HDP serdema pêşiya me de divê zêdetir guh bide vê.
Riha divê dîsa bifikire
Rêxistinên li bajarên kurdan gere careke din bifikirin em dikarin çawa asta dengên dewletê (AKP+Huda-Par) kêm bikin? 5 salên pêşiya me ev barê serekeye li ser milên wan. Û hin bajar divê bi taybetî bifikirin. Mînak Riha. Her demê 3 mebûs li Rihayê sedî sed bûn, vê carê dîsa heman mebûs girtine. 7'ê pûşperê de çawa 5 girtin ji 6'an daketin û vê carê çima daket 3'yan, yanê asta her gavê... Rêxistina Rihayê bi hûrbînî gere li meseleyê binêre. Heta li Rihayê HDP nebe yekemîn çareseriya meseleyê zehmet e.
Û Çewlig jî...
Meseleya Hevserokatî
Gotinek jî ji bo meseleya hevserokatî ez bibêjim: Wekî fikir tiştek rast e. Di meseleya Selahattin Demirtaş de tevgerê gavek mezin avêtiye û serketiye, lê di meseleya hevseroka din de bi ya min divê hinek din nîqaşê bike. Mînak çima ew jî ne ji rêxstina kurd be? Ma hewceye îlleh ji çepek be?
Meseleya jinan û berendaman jî heye... Mijara me belav dibe lê bi kurtî bibêjim ku di hilbijartinek din de divê ji her du aliyan ve jî baştir neqandinek çêbe.
***
Min ji bîr kiribû, hevalê min Zekî Ozmen bi bîra min xist: sipas ji bo hemû hevalên li derveyî Tirkiyeyê ku bi sedan kîlometre çûn û dengê xwe dan. Ha, divê ev deng zêdetir ba lê xem nake. Dîsa sipas.
.jpg)
