Tu dizanî girî çi ye; nexasim giriyê dayikan; nexasim giriyê dayikê Dersimiyên 1938'an? Diya te qet giriya ye? Te li giriyê dayika xwe govanî kiriye? Tu bûyî şahid ku diya te porê xwe rûçikandiye, serê xwe daye ber kulman, tepê sînha xwe çirandiye? Te ji dengê diya xwe lorîk guhdarî kiriye?
Diya te bî maye gelo? Bavê te qet hatiye kuştin û te dîtiye ku diya te li ser bavê te giriyaye? Birayên te hatine darvekirin û te dîtiye ku diya te li ser birayên te, li ser zarokên xwe çi girî kiriye?
Te ji dengê diya xwe ya bi girî ev lorîk guhdarî kiriye: "Malam bar kir lê lê, çûne zozane ,dînê lê dînê lê dînara min, goştê me xwar lê lê tûmişk û maran dînê lê dînê lê dînara min…"?
Hûn ji cih û warên xwe hatin koç kirin? Hûn di şkeft û berqefan de bi cih bûne? Hûn tî û birçî mane? Goştê we ji dûpişk û maran re bûye xwarin? Û ji bo van sedeman diya te, ji nîvê kezebê lorîk di guhê te de strandine?
Ku tu îşev çûyî mal, ji kerema xwe re çîroka qirkirina Dêrsimê, çîroka Şex Seîdê Kal ji diya xwe re bibêje? Ji diya xwe re bibêje ku me di "Şerê Felatiyê" de li Dêrsimê wiha kir, me di serhildanê Şêx Seîdê Pîran de wiha kir, wêneyên qirkirina wan nîşanî dayika xwe bide, lorîkên dayikên wan bi diya xwe bide guhdarî kirin, tê wî çaxî bibîne ku dê çawa digirîn, tê wî çaxî bibîne ku girîna dayika tê çawateyê.
Diya te wê ji te bipirse: "We wiha kir?"
Tu dê bibêjî: "Erê".
Wê ji te bipirse: "Tu van qirkirinan diparêzî?"
Tu dê bibêjî: "Erê, ji bo ku hûn bikenin, me wiha kir."
Diya te wê bibêje: "Kenê dayikan li ser giriyên dayikine din ava dibe? Tu dê bi vê gotina diya xwe tê negihe. Berî ku tu tê bigihê jî diya te wê ji te re wiha bibêje: "Tu êdî kurê min nîn î. Şîrê ku min di devê te re kirî bila li te herem be. Heta hetayê êdî ne ez ji te re dê ne jî tu ji min re kur î, zar û zêç î."
.jpg)
.jpg)
.jpg)
.jpg)
