Gelo Selmayek Cizîrî hebû an tunebû?
Hev û du dîtibûn, ji hev hez kiribûn?
Emê di van heşt malikên li jêr ku me ji "Senema sur ji semed şewqê ji heq daye wucûdê" girtine de, li bersivên van pirsên ku me kirine bigerin.
16-Leyletilqedre bi min ew seet û îde di salê
Şefqe kir perde hilanî, seherê şox û şepalê
Ew "seet"a ku Cizîrî qet ji bîr nekiriye û bi wî wekî îd û leyletilqedr e kîjan seet e gelo? Ev saeta ku hûrî jê re daketine û hemî gunehê wî hatine bexşandin kîjan saet e? Ev saet, ew saeta ku şox û şepala Cizîrî "şefqe" li Cizîrî kiriye û "perde"ya xwe li pêşber Melayê me hilaniye. Di vir de hilanîna perdeyê di wateya rastî de hilanîn e. Ev, ew saet e ku Cizîrî û şox û şepala wî bi dizî ve hev û dû dîtine û bi hev şabûne ku Cizîrî "tam"a vê saetê nikare ji bîr bike û wê saetê wekî îd û leyletilqedrê bi nav dike. Di vê saetê de Cizîrî û Şox û şepala wî di wateya rastî de bi hev şa bûne.
Ka em berdewama vê malikê bixwînin.
17- Îsandim û ji enwar û surê şubhi şemalê
Meşiha mest û şekerleb, bi me da mey ji peyalê
Di wê "seet"ê de Şox û şepala Cizîrî a "şekerleb" ber bi Cizîrî ve bi dilkêşiyek wekî fenerê meşihaye û ronahiya xwe daye Cizîrî û ew "vêxist"iye û mey bi wî daye.
Cizîrî dixwaze bibêje ku, di wê saetê de şepala min hemî cil û kincên xwe jixwe kirine û bi tazîbûna wê re, tena şepala min bûye wekî fenerek ku tariyê ronî dike, taritiya min ron kiriye û ji vê dîmenê ez jî vêketime. Dîsa dibêje, wê saetê, şox û şepala min lêvên xwe yên şekirîn bi min daye û ez pê serxweş û mest bûme.
18- Negiham secde bibim pir xecilîm ji wisalê
Hadiri berqê li dil da, ji tecella û şuhûdê
Di vê malikê de em baş dibînin ku êdî Cizîrî û Şox û Şepala wî gihaştine hev. Di vê gihaştinê de Cizîrî şermîdar bûye negihaya ku secde jê re bibe. Ma di wê kêliyê de; di wê kêliya ku Şepala wî mîna çirayekê wî ron dike, di wê kêliya ku Cizîrî ji vê dîmenê vêketiye, Cizîrî dê çawa bigihe ku ji şepala xwe re kirnûş bibe? Loma di wê kêliyê; di wê kêliya gihaştina wan de, zûzûka berqê li dilê Cizirî daye û ew di nav agirê pevşabûnê de negihaye ji şepalê re kirnûş bibe.
26- Bê hisab şox û şepalê li melê qehr û xeder kir
Ne em anîne xeyalê ne li halê me nezer kir
Belê.. Dem û dewran di ser wê "seet"a wê gihaştinê ve çûne û êdî Şepala Cizîrî dev ji Cizîrî berdaye û êdî Şepala wî, Cizîrî hew "aniye xeyalê" jî. Şepala Cizîrî, bê hesab qehr di dilê Cizîrî çandiye û bêbextî lê kiriye. Şepala wî êdî ne carek li wî nêriye û ne jî ew xeyal kiriye.
27-Qet ne kir şefqe libasê xedebê zêde li ber kir
Illeta cewr û cefa û elemê cih bi ceger kir
Şepala Cizirî, êdî ew şewqe ya ku li jorê ji Cizîrî re kirî û perdeya xwe jê re hilanî ji bîr kir û cil û kincên Xeydê li xwe kirin û nema pêça xwe da Cizîrî. Ev guherîna Şepal Cizîrî, gelek êş û nexweşî di cegere Cizîrî de bi cih kiriye.
Ma Cizîrî dê çawa neêşe? Ji aliyekî ve ew "seet"a ku ji Cizîrî re wekî îd û leyletilqerê bû, bi bîra wî tê û ji aliyekî ve jî ev saetên dirêj ku Şepela wî ne wî xeyal dike, ne jî pêça xwe didiye, ev saetên dirêj ku wekî dojehê ne, bi bîra wî tê. Helbet di nav vê qehra kûr de dê Cizîrî tim bibe wekî pereng.
Lê di vir de, divê em pirsek bikin: Gelo çi bû sedem ku Şepala Cizîrî wiha guherî û li soza xwe xwedî derneket û xeyidî?
28- Ellilandîn di firaqê sitemê sîne bi ker kir
Ahi hetta mirinê ev ji me ra dax û keser kir
Ev zordestî û nedadmendiya ku şepala Cizirî li Cizîrî kirî, ev dûrbûna Cizîrî ya ji şepala wî, sînga Cizirî ker kiriye û heta mirinê jê re bûye dax û keser
29- Sefera şam û iraqê li me xweş lazim û fer kir
Bi me da jehr û reqîban di devê şehd û şeker kir
Di nav vê bêbextî, van êş, kul û eleman de, ma Cizîrî dê çawa bikaribe terkewelat nebe?! Di vê rewşa ku Şepala wî, Jehrê bi Cîzîrê dide û şekir û hingiv di devê dijminan ve dike, dê Cizîrî çawa bikaribe berê xwe nede riyên dûr û winda?!
30- Em buwîn pêt û pereng lew ji wisalê me hezer kir
Nazik û neyşekerû xob û şêrîn qedd û hudûdê
Di nava van êş û pirsan de, di nav van bêbextiyan de, Cizîrî dibe pêt û pereng û hêviya xwe ji gihaştina Şox û şepalê dibire û xwe ji Şox û şepala xwe bi dûr dixe…
Ji van her heşt malikan em digihîjin wê encamê ku Selmayek Cizîrî hebû.
Em digihijin wê encamê ku Selmayê jî ji Cizîrî hez kiriye û heta "saet"eke wan bi hev re, bi hev şabûnê jî bihuriye. Lê piştî demekê, Selmaya Cizîrî li vê "seet"ê xwedî derneketiye û Selmaya Cizîrî, di riya Evînê de, Cizîrî bi tena serê xwe hiştiye û kiriye ku Cizîriyê me di vî agirê evînê de bişewite. Selmayê bêbextî li Cizîrî kiriye, soza xwe şikandiye.
Cizîrî, dike û nake nikare bi vê bêbextiyê bigihîje.
***
Nivîsên Şengul Ogur ên li ser Cizîrî:
-
- Di du rêzikan de xwendina Cizîrî
- Feqiyê ku bi Cizîrî re hevaltî kir kîjan Feqiyê Teyran e?
- Gelo jidayikbûna Cizîrî ne sed sal berê be?!
.jpg)
