Erê pirs ev e, çi eleqeya xwê û dewletê bi hev re heye? Ka em bi hev re hinekî serê xwe biêşînin...
Xwê nebe goşt bêhn dide û tê avêtin. Bi xwê em goştî diparêzin.
Amediyên heqîqî tenê penîrên heqîqî yên Amedê dixwin. Amediyên sexte û yên niha hinek dewlemend bûne penîrê sexte dixwin. Ha, ew penîrê Amedê yê heqîqî bê xwê nabe. Ji biharê de penîr ji bo bê parastin tê xwêkirin. Carinan hinek zêdetir xwê dikin lê xem nake.
Ger em bibêjin "Xwê" yek ji xurekên bingehîn ên mirovan e belkî hûn bawer nekin.
Ji bo zindîbûyîna nav hucreyên mirov berdewam be her roj divê 2-2.5 lître av bê vexwarin, 3-6 gram xwê bê xwarin. Ger her roj bi qasî ku divê mirov xwê nede laş wê çaxê pirsgirêkên ku nayên fêmkirin dê derkevin holê. Ji ber vê yekê yek ji xureka bingehîn jî xwê ye.
Tê zanîn îngilîzên ku Hindistan dagir kiribûn xwê difrotin Hindistanê.
Rêberê Hindistanê Gandhi banga boykota xwêya îngilîzan kir. Got "Ji dêvla hûn xwêya îngilîzan bixwin, çamûrê behra Hindistanê bixwin."
Îngilîzan bi xwêya ku difrotin gelek pere kar dikirin lê ev banga boykotê bû derbeyek mezin ji bo îngilîzan. Xwêya ku nedihat firotin li dikanan ma. Îngilîzan xwest bê pere xwê bidin gel, armanc ew bû ku boykotê bi awayekî bişkînin lê gel negirt û boykot jî neşikand.
Paşê li hemberî îngilîzan çalakiyên wisa pasîf ên din jî li dar ketin û encamê hûn dizanin; îngilîz ji Hindistanê derketin û welat azad bû.
Ev azadiya Hindistanê hemû bi xwê dest pê kir. Em dikarin bibêjin Hindistan wekî welatê ku bi xwê bû dewlet ket nava rûpelên dîrokê. Fînlandiya bi firotina hêkan bûbû dewlet.
Pirs ev e: Başûr dê bi çi bibe dewlet?
Niha, mînak li Başûrê me hêk ji Tirkiye û Îranê têne standin. Şîr ji Îranê tê û pê dondirme tê çêkirin. Birinc, savar ji Tirkiyeyê, û her wiha piraniya tiştan ji Tirkiyeyê diçe Başûr.
Pirsa diduyan, çend mîlyon kurd li Ewropayê xwêya kê bikar tînin?
Îdîa ew e ku li Ewropayê 2 mîlyon kurd dijîn. Ew 2 mîlyon kes çiqas xwê bikar tînin? Xwêya kîjan welatî? Ger ew 2 mîlyon kes xwêya wî welatî nekirin û berê xwe bidin welatek din dê derbeyek aboriyê ya çawa be?
Xwê yek ji mînakan e û mînakên din jî bi vî awayî.
Ma em nabêjin "Berjewendiyên DYA'yê (Dewletên Yekbûyî yên Amerîkayê) li Sûriyeyê hene loma ji wir naçe, ne ku heyranê ser û çavên me ye." Wê çaxê em kurd nikaribin tiştek bikin jî, em çima nikarin bi berjewendî, bi aborî tiştinan bikin?
Ma em nabêjin 50 mîlyon kurd li dinyayê dijîn? Ger wisa be ew 50 mîlyon salek xwê nekirin dê zirarek çawa bidin welatê ku xwê difroşin?
Ka we got çi? Ev 50 mîlyon kes xwê nekirin dê çawa be?
Ma hewce dike em mînakên din jî lê zêde bikin?
.jpg)
.jpg)
.jpg)
.jpg)
.jpg)
