Ewro Tirkîya de beledîyayê ke kurdan qezenc kerdî hukumdarê a mintiqa yê, hukumdarê yê cayî yê. Cayêko qezenç nêkerdî zî bi wasitayê endamanê xo yê meclisan, reyna wayîrê zaf selahîyetan ê û wayîrê yew hêz û yew qewetî yê.
Ez ke zana BDP se û di heb beledîyayê bajarê kurdan qezenc kerdî. Nê bajaran de beledîyayî şikenê gureyê kulturî, edebîyatî, hunerî û ziwanî bikerê. Xo ra hewce nîyo ke ma vajê zî, çunke zaf beledîyayî nê gureyî û xizmetî kenê.
Dinya alem şawito, labelê ma kenê nêkenê Dewleta Tirkîya, hukumata Tirkîya nêşawena! Seba ke rayîrê ziwanê kurdan roşin bibo û rayîr abibo pira ma va ziwanê ma fekê ma de bi wişk. Her roje şaro kurd, bi camêrdanê xo bî cinîyanê xo, bi xort û ciwananê xo sedemê perwerdeyê bi ziwanê dayika xo dest fîno qirreno, careno, bareno labelê no hukmat xo beno ker û nêşaweno.
Bê camêrd, cinî, xort û ciwananê kurdan êdî tut û qecekê kurdan zî bi pîlanê xo reyde barenê, qîrrenê la reyna goşê înan anêbeno û nê qirrayîşan nêşawenê. Çimê înan zî herhal bîyo kor ke hende kesî bi şew û rojan kuçan de qirenê pere nêkeno.
Nika no bar kewto milê nê beledîyayan! Cayêke beledîyayê kurdan kar kerdê ganî na mesela xebata ziwanî, kulturî û perwerdeyê bi ziwanê dayîke bi plan û programêk hel bikerê. Zaf cayan de tayê xebatan kenê labelê qîm nêkeno.
Dîyarbekir de bi nameyê “Banê Destekê Perwerdeyî” (Egitim Destek Evi) zaf cayî estî. Nê cayî ez şaş nêbî giredayê beledîyayan ê. Nê cayan de nê warî de xebate esta. Zafane zî nê xebatan pêşkêşê qecekan kenê.
Sewbînî zî beledîyayê Dîyarbekirî tayê xebatê bînan zî kenê. Nê warî de, warê kultur û ziwanî de hende tepa nêmanenê. Labelê hende xebate zî qîm nêkena. Ganî xebatêka newe û hewlêko newe destpêkerê. Bi plan û programêko newe gamêka newe berzê.
La ez wazena bala şima biancê hetêko bînî ser. Mi cor de zî behsa xebata beledîyayanê Dîyarbekirî kerd. Zafane zî seba rojanê taybetîyan afîş, lewha û billboardî bi ziwanê kurdkî nusîyenê û amade benê û cayanê umumîyan de alaqîyenê. Nê gureyî zî nê beledîyayî kenê.
Labelê nê lewha, afîş û billboardî biumumîyet bi dîyalekta kurmancî nusîyenê. Eke hebêk-diheb cayan de bi kirdkî bialaqîya yê zî şaş nusîyenê.
Nê warî de ganî beledîyayê ma ferqî nêkerê mîyanê dîyalektê kurdkî. Ma zanê ke bakur de di zaravayê kurdî estê. Kurmancî û kirdkî/zazakî. Gama ke ma nê her dî zaravayan danê têver ma tepay mendişê kirdkî vînenê. Xora her kes tepaymendişê kirdkî qebul keno û zano zî.
Ganî beledîyayê ma giranîya xebata xo ya kultur û zîwanî bidê kirdkî ser. No pêşnîyaz bê beledîyayê ma sazîyêka ma kurdan çînîya ke ma pêşnîyazê înan bikerê. Çunke ewro mintiqa ma de sazîyêkê îktîdar ê nê beledîyayê ma yê.
.jpg)
