Diyarname

7'emîn Kongreya Giştî ya Asayî ya Kongreya Civaka Demokratîk (KCD) li Kompleksa Werzîşê ya Şaredariya Kayapinarê ya Amedê roja 6'ê mehê dest pê kir û 7'ê mehê dê bi dawî bibe. KCD'ê dê xwe biguherîne û wekî "Meclisa avakar" kar bike.

Vane notên ji roja yekemîn:

- Kongreya bi şiara "Em bi neteweya demokraatîk jiyana azad ava bikin" pêk tê.

- Ji çar aliyên Kurdistanê, Tirkiye, Ewropayê mêvan hatin. Heyeteke di bin serokatiya endamê LRN a ya PDK'ya Îranê Muhammed Salîh de, ji Herêma Kurdistana Federal, nûnerên YNK, KNK, Tevgera Goran, ku ji 25 kesan pêk tê, dîsa ji 3 kantonên Efrîn, Cizirê, Kobanê ya Rojavayê komek ji 25 kesan pêk tên wekî mêvan beşdarî kongreyê bûn.

- Li Salonê bi zimanên kurdî, erebî, suryanî, ermenî û tirkî panqartên wekî "Em bi şiyara Kurdistana xweser li ser bingeha yekîtiya neteweyî kom dibin", "Şoreşa Kurdistanê şoreşa jin û ciwanan e", "Serokatiya azad azadiya Kurdistan", "Bi jina azad re ber bi neteweya demokratîk ve" hatine daliqandin.

- Wêneyeke mezin a Rêberê PKK'ê Abdullah Ocalan li pêşberê delegasyonê hate daliqandin. Dîsa salon bi şerîdên rengên kesk, sor, zer, spî û mor hatiye kişandin û bi balonan stêrk hatine çêkirin. 

- Li aliyê ku dê axaftin lê bê kirin jora wî, di nîvî de wêneyê Ocalan, rast û çepên wêneyên wî jî bi rêzê wêneyên Seyîd Riza, Şêx Seîd, Celadet Bedirxan, Elîşêr, Mele Mistafa Barzanî, Mela Seydayê Timoqî, Sema Yuce, Leyla Qasimlo, Delîla, Sakîne Cansiz, Fîdan Dogan, Leyla Şaylemez, Mazlum Dogan, Mahsum Korkmaz, Kemal Pîr, Musa Anter, Doktor Qasimlo, M. Hayrî Durmuş, Alî Çîçek, Akîf Yilmaz, Melayê Cizîrî, Cegerxwîn, hatine daliqandin.

-  Li her du aliyên dikê du vîzyona barkordê hatiye danîn, di ser de kurdî, tirkî, ermenî, suryanî û erebî tê derbas kirin. Hema bibêje hemû delegasyonên komcivînê bi kincên neteweyî beşdar bûne. 

- Mulkiye Bîrtane, Hilmî Aydogdu, Selçûk Mizrakli, Aynur Ozgul, Şehmus Bayhan û Sanîha Aydenîz ji bo Dîwana Kongreyê hatin hilbijartin.

- Axaftina destpêkê ji aliyê Endamê Meclisa Daîmî Osman Ozçelîk ve hate kirin û Ozçelik wisa got: “Bi hêviya kongreya me yekîtiya neteweyî pêk bîne, em bibin yek dil, yek aqil. Bi wê hêviyê em dest bi kongreya xwe dikin. Hûn bi xêr hatin. Li Şengalê gelê kurdê êzidî tê qir kirin û gelê kurd îro li wir di bin baneyê yekîtiyê de parastina gelê êzidî dike. 

- Piştî sirûda Ey Reqîbê peyama Ocalan bi kurdî û tirkî hate xwendin.

- Hevserokên KCD'ê Ahmet Turk û Aysel Tugluk axivîn. Tugluk wisa got: "Em mafê xwe bi xwe rêveberina gelê kurd nakin mijara bazarê. Em dixwazin mafê referandûmê yê nasname û herêman bê nasîn. Gel bila bikaribe birêvebirina xwe bike. Em dixwazin hemû gel azad bijîn. me ji bo vê yekê têkoşîn da meşandin, bedel da. Gelê kurd êdî li her cihî gihîştiye wê astê ku rojevê diyar dike.

Divê Kongreya Neteweyî êdî neyê taloq kirin û di vê kongreyê de jî bibe mîjara sereke ya nîqaşê. Bi îmzeya Birêz Ocalan, Birêz Talabanî û Birêz Barzanî ya hevpar divê kongre bê kirin. Kongre KCD’ê jî divê vê berpirsiyariya xwe bibîne. Divê kongreya neteweyî di nava vê salê de bê kirin."

Ahmet Turk jî wisa got: " Li Rojavayê Kurdistan li Başûr li hemberî çeteyên hovane xebatek gelek hêja gel, rêxistin û saziyên me didin meşandin. Ger yekîtî hebe serkeftin li pêşiya me û gelê me ye. Îro şoreş û gel yekîtiya xwe ava kiriye. Ez bi dilekî germ vê tînim ziman. Lê kêmasî di siyaseta gelê kurd de ye di siyasetmedaran de ye. Ji bo yekîtiya gelê kurd divê gelê kurd bi siyaseteke hevbeş li pêşerojê binihêrin û êrîşan bi siyaseteke stratejîk li hember derkevin û hev hembêz bikin. Îro di kongreya xwe de em bangewaziyê ji hemû siyaset û siyasetmedarên kurdan re dikin. Em dixwazin dengê KCD’ê bigihîje hemû partî, saziyên kurdan. Îro roja yekîtiyê ye. DAIŞ bi hovane li ser gelê Şengalê fermanek derxistibû. 73 ferman derbas dibûn lê fermana 74’an gelek giran bû. Ew bûyerên li ser gelê êzidî derbas bûn ez fedî dikim bînim ziman. Lê gelê êzidî di dîrokê de bi rastî jî bêxwedî man. Lê îro YPG, YPJ, HPG li gelê êzidî xwedî derdikevin û gel dizane ne bê xwedî ye. Em sipasiya xwe ji YPG, YPJ û HPG re tînin ziman û em wan pîroz dikin.”

Roja 7'ê mehê dê kongre bi nîqaş û nirxandinên delegeyan bidome û di dawiya rojê de dê hilbijartin pêk bê û her wiha dê encamnameya kongreyê bê nivîsîn û eşkerekirin.

Nûçeya eleqedar:

- Vaye bernameya Kongreya KCD'ê