QAMIŞLO

Di çarçoveya kampaniya piştgiriya bi welatiyên herêma Şengalê û Rojava re, îro alîkariyên ku welatiyên Bakurê Kurdistanê berhevkiribûn di deriyê sînor ê Nisêbîn ê di navbera Bakur û Rojava de, gihiştin bajarê Qamişlo.

Bi armanca alîkariya bi welatiyên Rojava û koçberên navçeya Şengalê ya Başûrê Kurdistanê ku derbasî Rojava bûne re, welatiyên Bakurê Kurdistanê hemleyeke berhevkirina alîkariyan dabûn destpêkirin. Alîkariya ku hatibû berhevkirin ji sê kamyonan pêk dihat û îro  di deriyê sînor ê Nisêbînê re derbasî bajarê Qamişlo bûn. Di dema şandina alîkariyê de mebûsê HDP'ê yê Şirnexê Faysal Sariyildiz, Hevseroka Şaredariya Nisêbînê Sara Kaya jî amade bûn û wan alîkarî radestî Rêxistinên Alîkariyan a Rojavayê Kurdistanê kir. Her wiha hate diyarkirin ku alîkarî ji madeyên xwarinê, cil, pêdiviyên zarokan, şîr, derman û hwd… pêk dihat.

Sariyildiz û Kaya derbarê mijarê de axivîn û dane zanî ku alîkarî ji welatiyên Bakurê Kurdistanê hatin berhevkirin û diyar kirin ku ji bo alîkariya bi welatiyên Rojava û koçberên Şengalê çi ji destên wan bê dê pêk bînin û berhevkirina alîkariyan li Bakurê Kurdistanê di bi awayekî rêk û pêk berdewam bike. Her duyan di axaftinên xwe de bal kişandin ser êrîşên çeteyên DAIŞ’ê li dijî kurdên êzîdî û gotin ku ew bi êrîşên xwe vîna gelê kurd armanc digirin.

Li aliyê din alîkariya ku hatiye şandin ji aliyê Rêxistina Alîkariyan a Rojavayê Kurdistanê hate wergirtin. Her wiha ji bo li welatiyan û koçberan bête belavkirin di ambarên bajarê Qamişlo û Dêrikê de hatin bi cihkirin. Rêxistinê beşeke ji alîkarî ji bo kampa Newroz a bajarê Dêrikê şand.

Xebatên alîkarî didomin

Her wiha xebatên berhevkirina alîkariyê li şaredariyên DBP'ê û saziyên sivîl ên Bakur didomin. Yên bixwazin alîkarî bidin dikarin bi van saziyan re bikevin nav têkiliyê.