ENQERE

Partiya Demokratîk a Gelan (HDP) îro Selahattin Demîrtaş wekî berendamê Serokomariya Tirkiyeyê nîşan da.

Ji bo vê yekê li Neva Palas Otel a Enqereyê civîna çapemeniyê hat li dar xistin. Berî daxuyandinê pankarta "Berendamê guherîn û ê gelan Selahattîn Demîrtaş" hat daliqandin.

Berendamtiya Demirtaş ji aliyê Serokê Dîwanê yê HDP'ê Gencay Gursoy ve hat eşkerekirin. Gursoy got ku ger hilbijêr destên xwe deynin ser wijdanê xwe û dengên xwe bidin dê serokomar bibe Demirtaş.

Di dema eşkerekirinê de mebûsên HDP'ê Îbrahim Binici, Demir Çelik, Faysal Sariyildiz, Pervin Buldan, Îdris Baluken, Hasip Kaplan, Gulser Yildirim, Halil Aksoy, Mulkiye Birtane, Erol Dora, Adil Zozanî, Sebahat Tuncel, Sirri Sureyya Onder, Altan Tan, Husamettin Zenderlioglu, Aysel Tugluk, Kemal Aktaş, Hevserokê Şaredariya MêrDînê Ahmet Turk, Serokê Giştî yê KESK'ê Lami Ozgen, Serokê Giştî yê ÎHD'ê Ozturk Turkdogan û gelek nûnerên saziyan amade bûn..

Demîrtaş piştî eşkerekirina berendamî axivî û got: "Ji 69'an heta Apê Mûsa, Hrant Dink, ala ku wan hiştiye emê li erdê nexin. Hin belkî ketibin xeyala derketina Çankayayê lê emê nîşanî wan bidin ku wisa netiştek hêsan e."

Berendamê Serokomariyê Demirtaş wisa got: "Ez gelek serbilind bûm û sipasiya hemû hevalên em bi hev re dixebitim dikim. Ne kes, bi rêgezên xwe emê derkevin Çankayayê û berendamtiya me jî li gor van rêgezan e. Di hilbijartinê dei du xêz dê bi hev re bikevin qayişkêşanê, yek jê xêza aştî û azadiyan, ya din jî xêza dewletparêz û kevneşopiya vê ye. Her du berendamên din li ser vê xêzê dixebitin."

Demirtaş got ku di hilbijartina serokomariyê de kêmasiya herî mezin nebûna berendameke jin e û wisa got: "Ligel vê yekê jî tekane xêza ku têkoşina azadiya jinê diparêze xêza me ye. Berendameke jin tune be jî, xeza jin û ciwanan dê mohra xwe li vê kampanyayê bidin."

Selahattin Demirtaş got ku bêyî ji hurmetê dûr bikevin dê di çarçoveya demokratîk de, kampanyayeke ku hêzê bide siyasetê bimeşînin û ew hêvî dikin ku berendamên din jî girêdayî heman tiştî bin.

Demirtaş got ku ji bo aştiyeke mayinde ya li Tirkiyeyê kî bibe serokomar jî ew dê xebata xwe çalaktir bikin û wiha dom kir: "Bêyî em çav berdin meqamê jorîn ê Çankayayê emê helwesta xwe ya li cihê lê hatine çewsandin bidomînin. Ji bo em van rêgezên xwe li asta herî jor nîşan bidin çi ji destê me bê emê bikin. Li Tirkiyeyê her kesê bixwaze piştgirî bide van rêgezan emê bi wan re bi hev re bimeşin. Ji îro û pêde emê bi fikreke kollektîf xebatên xwe bikin."