Diyarname

Di doza girtina Ak Partî de 6 endamên dadgehê got: Bila AKP bê girtin lê têre nekir. Dê alîkariya xezîneyê bê birîn.

11 endamên Dadgeha Zagona Bingehîn di 28'ê mehê de dest bi nîqaşa li ser girtina Ak Partî kiribûn. Dadgehê îro biryara xwe da. Ji 11 endamên dadgehê 6 endaman got bila AK Partî bê girtin. 5'an got bila alîkariya xezîneyê ya ji bo partiyê bê birîn û endamekî jî got bila Ak Partî neyê girtin. Ji ber ku ji bo girtina partiyê pêdivî bi dengên 7 endaman hebû Ak Partî nehat girtin.
Biryar ji aliyê Serokê Dadgeha Zagona Bingehîn Haşim Kiliç ve saet 18.05'an de hate eşkerekirin. Digel biryara betalkirina doza girtina Ak Partî her wiha biryar hate girtin ku alîkariya xezîneyê ya ji bo Ak Partî bê birîn.

Serdozgerê Dadgeha Bilind Abdurrahman Yalçinkaya di 14'ê adara 2008'an de bi îdîaya ku "Bûye navenda dijberiya laîkiyê" îdîaname li ser Ak Partî amade kiribû û doz hatibû vekirin. Raportorê dadgehê Osman Can li ser îdîanameyê rapora xwe amade kiribû û gotibû ku pêdivî bi girtina Ak Partî nîn e.

'Çavên 70 mîlyonî li me bû'

Serokê Dadgehê Kiliç li ser dozê wisa got: "Vê dozê encamên girîng ji aliyê aborî û siyasî e derxistine holê. Ji ber van li Tirkiyeyê çavên 70 mîlyon mirovî li Dadgeha Zagona Bingehîn bû.  Asta me ya xebatê çawa bû, bi vî çavî me li dozê mêze kir. Ji ber girîngiya doza hatiye pêşberî me me kir ku di kêliyeke zûtir de biryarê bidin. Em ji vî welatî hez dikin. Ji ber vê ne mimkûn bû em nebînin ev doz çiqas girîng e."

Kiliç di axaftina xwe de bang li siyasiyan jî kir û got: "Ji vir ez dixwazim bang li aktorên siyasî bikim, ger biryarên ne li gor civakê û zagona bingehîn hebin bi lez biguherînin."

Endamên ku deng bikar anîn

Serokê Dadgeha Zagona Bingehîn Haşim Kiliç, endam Sacit Adali, endam Ahmet Akyalçin, endam Serdar Ozguldur û endam Serruh Kaleli ji bo ku Ak Partî neyê girtin dengên xwe bikar anîn.

Wekîlê Serokê Dadgeha Zagona Bingehîn Osman Paksut, endam Fulya Kantarcioglu, endam Mehmet Erten, endam Abdullah Necmi Ozler, endam Şevket Apalak û endam Zehra Perktaş  ji bo ku Ak Parti bê girtin dengên xwe bikar anîn.

Sacit Adali, Ahmet Akyalçin, Serdar Ozguldur, Serruh Kaleli gotin ku partî bûye navenda dijberiya laîkiyê lê ev yek ji bo girtina wê têrê nake. Her wiha van 4 endaman xwest ku alîkariya xezîneyê ya ji bo Ak Partî bê birîn.

Wekî encam: Ak Partî nehat girtin lê hişyariyeke ji bo wê hate dayîn. Her wiha dê nîvî alîkariya xezîneyê ya ji bo Ak Partî bê daxistin. Li gor vê yekê, îsal Ak Partî dê 45 mîlyon YTL ji xezîneyê alîkarî bigirta, ev yek daket 22 mîlyon û 500 hezar YTL'yî.

Endamên dadgehê dê kurtedemê de li ser çima biryareke wisa daye encamê binivîsin û ev yek de di rojnameya fermî de bê weşandin.