Berlîn
Komek ku ji rojnameger, nûnerên saziyên sivîl û nivîskarên pêk tê, li ser hilbijartina Eyaleta Almanyayê NRW'ê banga piştgiriya ji bo berendamên kurd kir. Di hilbijartinên NRW'ê de berendamên kurd Ali Atalan û Hamide Akbayir jî berendam in.

Di daxuyaniya piştgiriya ji bo Atalan û Akbayirê de wisa hate gotin: “Rastiya ku Alî Alatan di rêza 8'an û Hamîde Akbayir di rêza 11'an de, di lîsteya çepan (DI E LINKE) de cih girtine, me li ber berpirsyariyeke mezin datîne, ku em bi moraleke mezintir hemû şêyan û derfetên xwe bi kar bînin, da ku dengê xwe bidin partiya DIE LINKE.”

Di daxuyaniyê de hate gotin ku ew kesên ji kevnoşopiyên siyasî yên cur bi cur tên û hîn jî dîtinên siyasî û felsefî yên cuda diparêzin, bangewaziya li jêr hatî nivîsîn îmze dikin û radigihînin:

"Wekî tê zanîn li Almanya li dora mîlyonek kurd dijîn. Ji wan dora 1/3 li eyaleta NRW'ê niştecih in. Civaka kurdan ku rehên xwe kûr li Almanyayê berdane, xwe wekî beşekî ji komelgeha almanî dibîne û her wiha wê wekî wargeh û mala xwe dihesibîne.
Lewre bi qasî beşdarbûna kurdan a aktîv di komelgeha almanî de, ew qasî polîtîka vî welatî jî bandoreke aktîv û dîrekt li wan dike, ku aktîv beşdarî wê û her wiha prosesa duristkirina biryara siyasî, bibin. Em, wekî beşekî ji gelê kurd, ku heta niha li welatê xwe di bin gefan de, ji hêla rêjîmên desthilatdar ve tê asîmîlekirin, binpêkirin û her wisa qedexekirinê, girîngî û nirxekî mezin didin xweragirtin, zindîkirin, pêşdebirin û nûjenkirina çand û zimanê xwe. Li ser vî esasî, em li vî welatê ku wekî welatê xwe dihesibînin, wateyeke mezin didin her beşdarbûneke siyasî di prosesa duristkirina biryaran de.
Hilbijartinên pêşwext, yên ku dê di 13’ê gulana 2012’yan de, li eyaleta NRW werin lidarxistin, ji bo civaka vê deverê bi giştî û bi taybetî ji bo kurdan ciyê girîngiyeke mezin e. Di rewşeke wiha de, gava em li lîsteyên namzetên partiyan dinêrin, em dikarin bêguman tê derbixin ku 'PARTIYA ÇEP' (DIE LINKE) çiqasî bi berpirsyarî mafên gelê kurd ê bindest li ber çavan girtiye.
Rastiya ku Alî Alatan di rêza 8'an û Hamîde Akbayir di rêza 11'an de, di lîsteya çepan (DI E LINKE) de cih girtine, me li ber berpirsyariyeke mezin datîne, ku em bi moraleke mezintir hemû şêyan û derfetên xwe bi kar bînin, da ku dengê xwe bidin partiya DIE LINKE.
Tê zanîn ku ev her du namzetên kurd, yên li jor binavkirî, çi li vir li hundir, çi jî li derve, her tim ji bo azadî û mafên gelê kurd tevdigerin.”

Van kesan îmzeya xwe avêtiye bin metna bangewaziyê:

Gunay Aslan, Helîm Yûsiv, Mehmet Bayrak, Metin Incesu, Dr. Zerdeşt Haco, Mehmet Tanriverdi, Xoşeng Broka, Yuksel Koç, Pîr Xidir Suleman, Newaf Xelîl Hido Babe Şeç, Peşimam Hizni Deniz, Huseyin Narli, Hesen Îrandost, Eli Cefer, Xanima Selwa Hesen, Mervan Osman, Rêzan Demir, Bilal Hesen, Dr. Mohammad Zeno, Nazir Palo.