Diyarname

Enstîtuya Kurdî ya Stenbolê pirtûkeke nû li ser Dêrsim û derdora wê weşand. Pirtûka ku Kerem Soylu amade kiriye, agahiyên têde ji arşîva Osmanî hatine girtin.

Enstîtuya Kurdî ya Stenbolê ku zêdetir pirtûkên li ser ziman û wêjeya kurdî diweşîne, pirtûkên li ser dîrokê jî digihîne ber destên xwendevanan. Enstîtuyê niha pirtûka Soylu “Osmanli Belgelerinde Dersim ve Civari (Di Belgeyên Osmanî de Dêrsim û Derdora Wê)” weşand.

Ev pirtûka navborî ku ji aliyê Kerem Soylu ve hatiye deşîfrekirin û sadekirin ji nav Weşanên Enstîtuya Kurdî ya Stenbolê derket. Di pirtûkê de bi belgeyên Osmanî rewşa siyasî û bûyerên di navbera salên 1726-1880’yî li ber çavan tê raxistin. Di vê xebatê de 48 belgeyên der barê Dêrsim û derdora wê de bi tîpên latînî û tirkiya îro hatine pêşkêşkirin. 

Di pirtûkê de helwest û nêrîna rayedarên dewleta Osmanî ya li kurdên li Dêrsimê û li derdora wê bi awayekî zelal diyar dibe. Hema bêje di teveka belgeyan de navê kurd (ekrad) bi wateyeke neyînî, bi gotinên mîna “ekrad-ı bednihad”, “ekrad-ı bedayin” derbas dibe. Her wiha digel qewmê wan, bîr û baweriya wan qizilbaşî jî bi zimanekî kirêt tê pênasekirin. Ev yek jî nîşan dide ku helwesta rayedarên tirkan li hemberî kurdên Dêrsimê ji mêj ve neyînî bûye.

Kesên ku bixwazin li ser Dêrsim û derdora wê xebatê bikin, yan bibin xwedî agahiyên dîrokî e pirtûk ji bo wan dê bibe çavkaniyeke girîng.