EFRÎN

Li Rojavayê Kurdistanê xebatên îlankirina rêveberiya xweseriya demokratîk ber bi dawiyê ve diçin. Navçeya navendî ya Kantona Efrînê ku yek ji sê kantonên hatine avakirin e, nûnerên xwe yên ji bo Meclisa Kantona xwe hilbijart. Li Qamişlo jî ji bo avakirina meclisa rêveber a xweseriyê ku dê heta hilbijartinan wekî rêveberiya herêmê kar bike, civîn hate lidarxistin.

Piştî navçeyên Şiyê, Cindirês û Şêrawa, navenda Efrînê jî nûnerên xwe yên meclisê hilbijart û di amadekariyên Xweseriya Demokratîk de gaveke girîng avêt.

Li gorî biryarên civîna 6-7'ê Rêbendanê ya Meclisa Qanûndanînê ya Rêveberiya Xweseriya Demokratîk a Rojavayê Kurdistanê, her kanton wê meclisa xwe ya xweser ava bike. Meclisa Qanûndanînê "Hevpeymana Civakî" ya xwedî wesfa destûra bingehîn e qebûl kir û Rojavayê Kurdistanê wekî 3 kantonên ji Cizîr, Kobanê û Efrînê destnîşan kir. Ev Modela Rêveberiyê li ser çar lingan hat rûniştandin: Sîstema Kanton, Meclisa Qanûndanînê, Rêveberî û Desteya Edalet û Hilbijartinê ya Bilind. Li gorî biryara Meclisa Qanûndanînê, ji bo diyarkirina Meclisa Rêveberiya Xweseriya Demokratîk, divê di nava çar mehan de hilbijartin bên organîzekirin. Kantona Cizîrê wê bibe xwedî meclîseke ji 101 kursiyan. Li her kantonê wê 20 wezaret werin avakirin.

Di vê çarçoveyê de li herêmê ev demeke civînên gel tên lidarxistin. Li Efrînê îro jî bi beşdariya endamên meclisa gelek herêman, civîneke berfireh hat lidarxistin.

Di civîna bi beşdariya bi dehan delegeyan de Endama Koordînasyona Yekîtiya Star Arşem Kurdman axaftinek kir û diyar kir ku gelên li Rojavayê Kurdistanê, ji bo çarenûsa xwe diyar bikin û rêveberiya xwe ava bikin bûne hêzek. 

Arşam Kurdman, destnîşan kir ku hilbijartinên meclisa rêveberiya xweseriya demokratîk hêza gelê kurd a rêveberiyê nîşan dide.

Piştî axaftinan delegeyan dengê xwe bikar anîn. Ji bo navenda Efrînê 27 nazmetan li ber xwe dan û 6 jê jin 16 kes wekî parlamenter hatin hilbijartin.

Çav li rêye ku di rojên pêş de hilbijartinên navçeyên Mobata, Raco û Şera jî bêne lidarxistin û nûnerên van navçeyan jî bêne hilbijartin.

Navçeyên Şêrawa û Şiyê yên Efrînê, nûnerên xwe yên ji bo Meclisa Xweseriya Demokratîk di 14'ê rêbendanê de hilbijartibûn. 

Di hilbijartinên li navçeya Şêrawa de 10 namzetan li ber xwe dan û di encama dengdanê de 2 jê jin 5 kes wekî Parlamenterên Meclîsa Xweseriya Demokratîk hatin hilbijartin.

Di heman rojê de li navçeya Şiyê jî hilbijartin hebû. Li vir jî 12 namzetan li ber xwe dan û di encama dengdanê de 2 jê jin 4 parlamenter hatin hilbijartin.

Cindirêsê jî berî van navçeyan hilbijartina xwe kiribû, 7 parlamenterên xwe ji bo Meclisa Xweseriya Demokratîk diyar kiribû.

DI WEZARETAN DE WÊ HEMÛ PÊKHATE BÊN TEMSÎLKIRIN

Li aliyê din, bi armanca avakirina meclisa rêveber a projeyê li avahiya Komîteya Têkiliyên Dîplomasiyê ya li bajarê Qamişlo civînek lidar xist. Civîn ji çapemeniyê re girtî hate lidarxistin.

Piştî civînê Endamê Meclisa Qanûndanînê ya Demî Luqman Ebdullah  agahî da çapemeniyê û got ku di civînê de, rêbazên xebatê yên meclisa rêveber û têkiliyên wê yên bi partî, rêxistin û saziyên di nava projeyê de cîh digirin re hatin nîqaşkirin.

Luqman Ebdullah diyar kir ku di civînê de li ser kesayetên ku dê di wekî şêwirmendan (wezîr) di nava meclisa rêveber de cîh bigirin jî nîqaş hatine meşandin. Ebdullah got ku ji bo 20 şêwirmendiyên (wezaret) ku di civîna Meclisa Qanûndanînê ya 6’ê rêbendanê de hatibûn erêkirin, wê her pêkhateyek ku di nava projeyê de cih digirin, pêşniyarên xwe pêşkêş bike. Ebdullah anî ziman ku di civînê de hatiye gotin ku divê ev kesên hanê xwedî tecrube û têgihîştî bin da ku karibin erka şêwirwendiyê ya rêveberiya xweseriya demokratîk pêk bînin. 

Ebdullah destnîşan kir ku kesên dê bêne pêşniyarkirin, piştî ku Dîwana Meclisa Qanûnsaziyê ya Demî erê kirin, wê di civîna Meclisa Qanûnsaziyê de bêne qebûlkirin.