Diyarname

Enstîtuya Kurdî ya Stenbolê 4'emîn Kongreya xwe ya Asan li dar xist. Di kongreyê de pergala hevserokatî hat qebûlkirin.

Enstîtuya Kurdî ya Stenbolê 4'emîn Kongreya Asan a Komeleya Enstîtuyê li avahiya xwe bi beşdariya delege û mêvanan li dar xist. Li ser navê Enstîtuyê Yusuf Bekçi axaftina destpêkê kir û qala girîngiya enstîtuyê kir. Di kongreya ku Şefik Beyaz, Mulazim Ozcan û Ayşe Uyar ji bo dîwanê hatin hilbijartin de, Serokê Enstîtuya Kurdî Zana Farqînî qala du salên borî kir. Farqînî got ku wan tiştên daye ber xwe sedî 50-60'ên wan anîne cih û diyar kir ku ligel hin çalakiyên ji rêzê 68 çalakiyên muhîm li dar xistin.

Rêveberiya Enstîtuyê di vê serdemê de di Sedsaliya Rojî Kurd de Rojî Kurd bi tîpên latînî çap kir, pirtûka perwerdehiyî hînker ji nû ve çap kir, ferhengên navincî û ferhengên mezin careke din çap kirin, 4 hejmar Zend derxist pirtûka Kerem Soylu ya li ser belgeyên di Arşîva Osmanî de Dêrsim, di dozên KCK'ê de parêznameyên parêzer, rojnameger û siyasetmedaran wergerandin kurdî, konferansa li ser kirmanckî çêkirin, qursên ku navê "Xebatên Atolyeya Zimanê Kurdî" lêkirine li dar xistine û di vê demê de 1500 kesî zêdetir beşdarî van qursan bûne.

Piştî axaftinan ji bo rêveberî bi lîsteyekê derbasî hilbijartinê bûn. Di encamê de Sami Tan û Gulseren Yilmaz ji bo Hevserokatî, Ali Arslan, İhsan Akyuz, Muzaffer Avşar, Haci Sayin û Gulşen Erdogan ji bo rêveberî hatin hilbijartin. Tahir Baykuş, Aysel Çetin, Ayhan Dinç, Ulaş Avşar, Yusuf Bekçi, Kader Yalçin, Semra Ecer ji bo rêveberiya yêdek; Edip Korkmaz, Ronahi Onen, Sabri Teker ji bo Lijneya Raçavkirinê hatin hilbijartin.

Piştî hilbijartinê Hevserok Sami Tan û Gulseren Yilmaz sipasiya xwe kirin. Tan got ku berê navenda rewşenbîrî li Stenbolê bû, lê çû Amedê û wisa dom kir: "Kurdistan çêbibe jî Stenbol wê cihê rewşenbîriyê be. Loma ji vir çi ji dest emê emê bikin. Di vî warî de em bang li akademîsyenan jî dikin ku ev der mala wan e, werin di nav xebatan de cih bigirin." 

Sami Tan û Gulseren Yilmaz ji bo Hevserokatiya Enstîtuya Kurdî ya Stenbolê hatin hilbijartin.