STENBOL

Nûçegîhanê DÎHA'yê Kenan Kirkaya yê ji doza çapemeniyê ya 'KCK'ê girtî ye, di dema ku ew dibirin nexweşxaneyê de leşkeran êrîşê wî kir.

Rojnameger Kenan Kirkaya û girtiyên ji doza DHKP-C'yê Tolga Bulbul, Ûtkû Aykan û Haydar Yeşîlbîngol di 20'ê sermawezê de ji Girtîgeha Tîpa F ya Hejmara 1 ya Kandirayê sewkî Nexweşxaneya Diranan a Yûvacikê dihatin kirin. Wê demê bi îdîaya ku "kamerayên hundirê wesayîta rîngê bi peçeteyê girtine" leşkeran êrîşê wan kir.

Hat ragihandin, li dû êrîşa li wesayîta rîngê ku 40 deqeyan dewam kir fermandarekî leşkeran hatiye cihê bûyerê û gotiye, "Armanca me ne îşkencekirin e, lê hûn me neçar dihêlin."

Piştî êrîşê her çend Kenan Kirkaya û Tolga Bulbul birin nexweşxaneyê jî bi sedema "dem nemaye" bêyî werin dermankirin ew vegerandin girtîgehê.

Li ser vê yekê Komeleya Rojnamegerên Hemdem û Sendîkaya Rojnamegerên Tirkiyeyê daxuyaniyeke nivîskî weşand û êrîşa li ser rojnameger Kenan Kirkaya şermezar kir.