AMED

Şaredarên BDP'yî bi rojeva rojavayê Kurdistanê li Amedê bi lezgînî kom bûn. Şaredaran dan xuyakirin ku Tirkiye bi lêkirina 'dîwarê şermê' re dixwaze şoreşa li Rojava bifetisîne. Şaredaran silav li sekna Şaredara Nisêbînê Ayşe Gokkan kir. Şaredaran destnîşankirin ku ewê roja 7'ê mehê bi gelê xwe re li Nisêbînê bin û li dijî vî dîwarê şermê rawestin.

Şaredarên BDP’ê ji bo hilbijartinên 2014’an, rewşa Rojava û dîwarê şermê ku li Nisêbînê tê xwestin di navbera binxet û serxetê de were lêkirin, li Amedê hatin cem hev. Civîn li Navenda Çandê ya Cegerxwîn bi beşdariya bi dehan şaredar û Parlamenterê BDP’ê yê Mûşê Demîr Çelîk ku ji rêveberiyên heremî berpirsiyar e pêk hat. Di navbera nîvro de şaredaran daxuyanî dan. Li ser navê şaredaran Şaredarê Bajarê Mezin yê Amedê Osman Baydemîr axivî. 

Baydemîr diyar kir ku wan di civîna xwe de hilbijartinên herêmî, pêvajo, dîwarê şermê û helwesta Şaredara Nisêbînê Ayşe Gokkan a li hember dîwarê şermê nirxandine. Baydemîr wiha got: “Berî her tiştî hemû şaredarên me û tevî navenda partiya me ya giştî, em ji dil û can hêviya aşîtiyê li hemû Rojhilata Navîn dikin. Her wiha daxwaza siyaseta me armanca gelê me li Rojhilata Navîn di navbera hemû gelan de, gelê kurd, tirk, ereb, fars û gelê qedîm aştiyek pêk were. Lê ji bo vê divê hemû gel bigihîjin mafê xwe yên çandî, zimanî û xwezayî. Her wiha li Rojava li binxetê gelê kurd jî wekî hemû gelê cihanê daxwaza mafê xwe yên xwezayî, mafê statuya xwe dike. Ev maf wek şîrê dayika wan li wan helal e. Îro di sedsala 21'ê de di navbera binxet û serxet de, ku armanca me û daxwaziya hemû mirovahiyê ji mayînan bê paqij kirin e, lê mixabin bendê nû tên ava kirin. Ev li dijî wijdanê mirovahiyê ye. Her wiha banga me li hemû cîhanê ye ku li Rojhilata Navîn pêwîst e em sînoran sist bikin. Ji bo gel, mirovahî karibe bi dilsozî, dilxweşî bi hev re bikevin têkiliyê.” 

‘EM ŞAREDAR TEV PIŞTGIRIYÊ DIDIN AYŞE GOKKAN’

Baydemîr di berdewamiya axaftina xwe de anî ziman ku dîwarê tê ava kirin li ser qedera kurdan dê were ava kirin û wiha pê de çû: “Kurd êdî vê naxwazin. Hemû gelên serxetê binxetê, başûr, bakûr, rojhilat, rojava. Hemû dizanin sedsala 21. sedsala tifaqê ye. Sedsala xebata ji bo azadiyê, wekheviyê, ji bo jiyaneke hevpar e. Ji bo vê yekê jî em hemû şaredar sekna ku niha Seroka Şaredariya me ya Nisêbînê Birêz Ayşe Gokkan nîşan daye piştgiriya wê dikin. Di 7’ê mijdarê de wek navenda partiya me diyar kiriye hemû kes divê piştgirî bide gelê me yên Rojava, Efrîn, Hasekî, Qamişlo û hemû bajar û bajarokê binxetê. Em bi hêvî ne wê bi tifaqê sedsala 21. bibe sedsala kurda, sedsala azadiyê, sedsala biratiya gelê Rojhilata Navîn.”

'BI DÎWARÊ ŞERMÊ RE DIXWAZIN CAREKE DIN KURDISTANÊ DAGIR BIKIN'

Piştî Baydemîr Parlamenter Demîr Çelîk jî axaftinek kir. Çelîk bibîr xist ku şaredara wan Ayşe Gokkan li hember “Dîwarê Şermê” ketiye rojiya mirinê û got ku ew piştgirî didin vê  helwestê. Çelîk wiha got: “Li ser navê BDP’ê em Birêz Ayşe Gokkan silav dikin em ê ligel têkoşîna wê bin. Di 7’ê mijdarê de temamê hilbijêr û gelê me ji bo sekna hember qirkirina gelê Rojava li Nisêbînê bin. Dîsa derdorên ku qetlîamên bi destê El Nûsra û El Qaîde têr nabînin, bi dîwarê şermê dixwazin cardin Kurdistanê îşgal û îlhaq bikin. Em ê li hember vê dagirkeriya Tirk ligel Rojava û gelê Rojava bisekinin.” Çelîk daxuyand ku di sala 1989’an de di şexsiyeta dîwarê Berlîn de mirovahiyê dîwarê şermê hilweşandiye û wiha pêde çû: “Lê Tirkiye cardin tenezulî dîwarê şermê dike. Ev nayê qebûl kirin. Ev şerma mirovahiyê ye. Ne di mirovahiyê de ne jî di qanûnên navneteweyî de cihê vê yekê heye. Divê temamê saziyên navneteweyî vê yekê bibînin û li hember vê bisekinin.”

‘TIRKIYE DIXWAZE BI DÎWARÊ ŞERMÊ ROJAVA BIFETISÎNE’

Çelîk diyar kir ku şîfreya çareseriya pirsgirêka kurd nêzîkahiya li hember Rojava ye û ev gotin anî ziman: “Ji ber vê yekê Tirkiye dixwaze bi El Nusra û El Qaîde dîsa bi dîwarê şermê wir bifetisîne. Em vê şermê qebûl nakin. Em cardin şaredara me Ayşe Gokkan silav dikin. Dîwarê şermê pirotesto dikin. Em ê di 7’ê mijdarê de ligel gelê Nisêbînê li cem gelê Rojava bin.” 

Çelîk di dawiya axaftina xwe de diyar kir ku hemû serokê şaredariyên wan diyar kirin e ku ew bên peywirdar kirin neyên peywirdar kirin jî dê li gora paradîgmaya azadiya jinê, ekolojî û civakeke demokratîk tevbigerin.