Diyarname

Rêberê PKK'ê Abdullah Ocalan di hevdîtina bi Heyeta BDP'ê re li ser Rojava wisa got: "Ambargo û dorlêgirtina li ser Rojava nayê qebûlkirin. Divê zêdetir xwedî li têkoşîna il Rojava bê derketin."

Roja 14'ê mehê Wekîlên Serokê Koma BDP'ê Pervin Buldan û Îdrîs Baluken çûn Girava Îmraliyê û bi Ocalan re hevdîtin pêk anîn. Baluken ji bo Stêrk TV axivî û got ku Ocalan gotiye divê zêdetir xwedî li rojavaya Kurdistanê bê derketin. Li gor gotina Baluken Ocalan rewşa Rojava baş dişopîne û wisa gotiye: "Ji bo deskeftiyên Rojava ber bi sazîbûnê ve biçin, pêwîste pêvajo bilez pêşkeve. Xebatên ku heya roja îro hatine kirin bi wate ne lê belê pêwîst e ev xebat bi awayekî ku encam bigire bêne berfireh kirin. Bi taybet li hemberî çeteyên êrîş dikin pêwîst e mekanîzmayên parastina cewherî ên xweparastinê hîn zêdetir bêne xurt kirin. Ji bo kurê Hevserokê PYD’ê Salih Muslim Şervan Muslim ez sersaxî ji bo mala Muslim û hemû gelê kurd dixwazim. Ji bo li her çar parçeyên Kurdistanê nêzîkatiyên van çeteyan bêne teşhîrkirin, li Amedê di bin navê Kongreya Îslama Demokratîk de kongreyek bê lidarxistin dê pir biwate be. Di kongreyê de cewherê Îslamê, felsefeya wê, cewherê ol û fazîlet tê çi wateyê nîqaşek berfireh bê kirin û ji her derdorî kes tevlî bibin, her wiha di aliyê gel de jî ev çete bêne teşhîr kirin."

Her wiha Baluken dibêje Ocalanî polîtîkayên Tirkiye û başûrê Kurdistanê ên li hemberî Rojava jî rexne kirine û ev yek gotine: "Em ambargo û dorpêça ku Tirkiye li ser sînor pêk tîne qebûl nakin û herî dawî jî dîwarê ku li Nisêbîn û Serêkaniya serxetê ava dikin, pir zelal diyar e ku hedefa wan şerek mayînde yê kurd-tirkan bidin çêkirin. Ev avakirina dîwar karê kesên dixwazin şerek dîrokî yê kurd-tirkan bidin çêkirin e. Ev şerê Filistîn-Îsraîle tîne ser vê xakê. Pêwîst e demildest dewlet ji vê xeletiya xwe vegere. Başûrê Kurdistanê jî bi taybetî nayê qebûlkirin ku deriyê Sêmalka girtî be, êdî ev vegeriyaye zilmekê. Bi taybet gere hêzên başûrê Kurdistanê û PDK dest ji vê helwesta xwe ya bêwate ya heya îro dom kir berde û pêwîst e li gorî rihê Kongreya Neteweyî nêzîkatiya pêwîst ya li hemberî Rojava tevbigere. Ligel hemû nêzîkatiyan jî, têkoşîna gelê Rojava pir girîng e, dê encam bistîne û pêwîst e gelê kurd jî ji her çar parçeyan xwedî li têkoşîna Rojava derbikeve.”