ABÎD KAR - HEWLÊR

Partiya Çareseriya Demokratîk a Kurdistanê (PÇDK) bi daxuyaniyeke çapemeniyê bang li Hikumeta Herêma Başûrê Kurdistanê kir ku di çarçoveya berjewendî û hestên neteweyî de nêzî rojavayê Kurdistanê bibe.

PÇDK, ji bo balê bikişîne ser rewşa li rojavayê Kurdistanê û bang li hikumeta herêmî bike ku wezîfeyên xwe yên neteweyî ji bo Rojava bi cih bîne, li ber dergehê Palemana Herêma Başûrê Kurdistanê daxuyaniyek da çapemeniyê. Di daxuyaniyê de nûnerên PYD, BDP, Yekîtiya Jinên Welatparêz û Tevgera Ciwanên Welatparêz û sedan kesên ji deverên cuda hatin amade bûn. Daxuyanî bi deqeyekê rêzgirtin ji bo cangoriyên Kurdistanê dest pêkir. Beşdarên çalakiyên alên PÇDK’ê, PYD’ê, wêneyên Rêberê Gelê Kurd Abdullah Ocalan û pankartên bi nivîsa “Bijî YPG” û “Em berxwedana gelê Rojava silav dikin” hildan.

Daxuyanî ji aliyê Hevseroka PÇDK'ê Necîbe Omer û endamê Desteya Rêveber Mam Hejar ve hat dayîn. Di daxuyaniyê de ji hikumeta herêmê hat xwestin ku deriyê sînor ê Sêmalka bê şert û merc li rojavayê Kurdistanê veke û ji hikumetê hat xwestin ku li gorî berjewendiyên neteweyî tevbigere.

Hevseroka PÇDK'ê Necîbe Omer bal kişand ser rewşa gelê rojavayê Kurdistanê û got, “Wekî tê zanîn zêdeyî salek e gelê me li rojavayê Kurdistanê bi bîr û baweriyek pir xurt li ber xwe dide. Gelê kurd li Rojava hinek destkeftî ketine destê wan, lê dijminên gelê kurd xwe li vê yekê ranagirin û êrîşî gelê kurd dikin. Ji aliyek ve rejima Esad ji aliyekî ve jî dewleta Tirk û komên çete û ji aliyê din ve jî girtina deriye sînor ê Sêmalka ji aliyê Hikumeta Herêma Kurdistanê ve. Ev dibe sedem ku li rojavayê Kurdistanê gel perîşan û birçî bibe, gund û erdên xwe biterikînin û berê xwe bidin başûrê Kurdistanê. Pêwîst e deriyê sînor bê vekirin. Ji bo hem di aliyê bazirganî hem jî di aliyê alîkariya mirovahî de.”

Omer bang li Hikumeta Başûrê Kurdistanê kir ku erkê xwe pêk bîne û wiha berdewam kir; “Sedema kombûna me ya li ber deriyê Parlemana Kurdistanê ew e ku, ji bo Parlemena Kurdistanê erkê xwe bi cîh bîne û zextê li wan aliyan êrîşî kurdan dikin. Parlemana Herêma Kurdistanê ji vê yekê berpirsiyar e. Pêwîst e deriyê sînor ji aliyê bazirganiyê ve bê vekirin. Ji bo ku gelê Rojava bikare pêwîstiyên xwe tedarik bikin û alîkariya li Başûr tê komkirin jî bigihîje rojavayê Kurdistanê. Daxwazek din jî ya me ji Hikumet û Parlemana Kurdistanê ew e ku, ew hêzên terorîstî ku li başûrê Kurdistanê xwe bi cih kirine û ciwanên kurd dişinin rojavayê Kurdistanê pêşî li wan bigire. Pêwîst e her kes di vê demê de li ser meseleya rojavayê Kurdistanê hestiyar nêzîk bibe.”  

SEKNA GELÊ ROJAVA SEKNEKE BI RÛMET E

Li ser navê PYD’ê jî endamê Meclisa Navendî Cemîl Ehmed axivî û bal kişand ser rewşa gelê rojavayê Kurdistanê û wiha got: “Li rojavayê Kurdistanê komkujiyek hat jiyîn. Li milekê jî li ser navê Îslamê, xwe di nava kurdan de diteqînin. Bi vê yekê dixwazin gelê kurd bê îrade bihêlin, lê gelê kurd wê tu caran serê xwe netewîne.”

Ehmed bal kişand ser rewşa penaberên ku ji Rojava tên û destnîşan kir ku sekna li Rojava sekneke dîrokî û bi rûmet e. Cemîl Ehmed wisa got, “Gelê Rojava yên ku berê xwe didin başûrê Kurdistanê ji ber bê derfetiyên aborî ne. Ji ber ku derî ji hemû aliyan ve ligel hatiye girtin gel nikare pêdiviyên xwe pêk bînin. Ji ber vê jî daxwaz ji hikumetê û aliyên pêwendîdar dikin ku dem ji ya din zûtir pêdiviyên gelê rojavayê Kurdistanê bi cih bînin da ku rojavayê Kurdistanê vale nebe.” 

Piştî daxuyaniyê dosyayek pêşkêşî parlemena Başûrê  Kurdistanê hat kirin. Dosya ji aliyê nûnerên YNK’ê û PDK’ê Bêrîvan û Semîran ve hatin wergirtin.

Daxuyanî bi diruşmên “Bijî berxwedana Rojava", "Bijî Serok Apo" bi dawî bû.

ANF