Qoser

Serdozgerê Komarê yê Qoserê got ku şewitandina gundan û kuştinên kiryar nediyar bi awayekî 'bipergal' karê JÎTEM'ê û ev kom jî têkiliya wan bi dewlet û siyasiyan re heye.

Li gor nûçeya Mesut Benli ya di rojnameya Radikalê de Serdozgeriya Komarê lêkolîna xwe ya li ser Serleşkerê wê demê yê Qoserê Atilla Ugur (niha di Doza Ergenekonê de girtiye) temam kir. Dozgerî li ser valakirina gundan û kuştina kiryar nediyar ya di serdema Atilla temam kir û di encamê de diyar kir ku ev yek bi awayekî 'bipergal' bi JÎTEM'ê ve girêdayî ye.

Dozgerî îdîa kirin ku Ugur 'berpirsê Qoserê7 yê JÎTEM'ê ye. Dozger got ku şikeke xurt heye ku wê demê JÎTEM'ê gund vala kirin, kuştinên kiryar nediyar kirin û wisa dom kir: "Eşkereye ku di navbera salên 1993-1996'an de kuştinên kiryar nediyar, windakirina di bin çavan de, valakirina gundan û bûyerên îşkenceyê çêbûne. Bi vê re jî eşkereye JÎTEM'a koma dijzagonî hebûye û berevajî ku tê îdîakirin vê komê piştî salên 1990'î jî karê xwe domkiriye."

Di fezlekeya dozger amade kiriye de dibêje ku tekane rayedar serbaz û yekîneyên di bin fermana wan de bûne, her wiha meqamên edlî û îdarî li hemberî kirinên wan çavên xwe girtine û deng nekirine.

Dozger dibêje ku JÎTEM'ê ne tenê karên dijqiqûqî kirine, di heman demê de berjewendiyên nemafdar jî bi dest xistine û wisa gotiye: "Mirov bêyî derxin pêşberî dadgehan ew girtine bin lêpirsînê û kiştine, ew avêtine bîrên avê û wisa bûyerên wehşî kirine. Ev yek bi 'têkoşîna bi terorê re' nayê qebûlkirin, berevajî vê, ev yek bixwe teror û sûc e. Ev rêxistina ku ji butçeya dewletê pere xerc kiriye, pê mirov îşkence kirine û kuştine; îhtîmaleke mezin e ku têkiliya wê bi siyasiyên wê demê re hebe û ev yek hêjayî lêkolînê ye."