Diyarname
Ji bo piştgiriya girtiyên kurd ên di girtîgehan de dengen ji Başûr jî hat. PDK, YNK û Goranê piştgirî da çalakiya grevên birçîbûnê ya ku îro ketiye roja 54'an.

PDK
Berdevkê PDK'ê Cafer Emînkî diyar kir ku ew piştgirî didin daxwazên girtiyên siyasî yên kurd û ji hikumeta Tirkiyeyê xwest ku bi awayekî erênî nêzî daxwazên girtiyan bibe û wan bîne cih.

Goran
Serokê Koma Meclisê ya Tevgera Goran Kardo Mihemed got ku ew wekî tevger bi her awayî piştgirî didin girtiyên di greva birçîbûnê de. Mihemed çû serdena çalakgerên ku ev sê roj in li ber parlemenê ketine grevê û got ku ew bi her awayî amade ne piştgiriyê bidin çalakiyê.

YNK
Berdevkê Çapemeniyê yê YNK'ê Azad Cundiyanî jî ji bo rojnameya Hawlatî axivî got ku nêzîktêdayîna YNK'ê eynî wekî axaftina Mele Bextiyarî (Nûnerê Serokomarê Iraqê û Serokê YNK'ê Celal Talabanî) ya di Kongreya BDP'ê de ye û vê helwesta xwe didomîne.

Bextiyarî di Kongreya BDP'ê ku roja 14'ê meha borî li dar ketibû de wisa gotibû: "Di dîrokê de rêberên wekî 'terorîst' hatine bi nav kirin îro welatan bi rê ve dibin. Ez hêvî dikim Tirkiye jî dê rojekê pirsgirêka xwe ya navxweyî çareser ibke û Ocalan jî dê li welatê xwe bibe serok." Her wiha Bextiyarî ji bo çareseriya pirsgirêka kurd azadiya Ocalan xwestibû.