Diyarname

"Peyvdank" bernameya lîstikek e û yên bixwazin dikarin vê daxin, bi hev re bilîzin û bi vê yekê hînê peyvên kurdî bibin, yan jî peyvên xwe yên bi kurdî pêşvetir bi"bin, xirtir bikin.

"Peydvank" ji aliyê hezkirên kurdî ve hatiye amadekirin. Kurdên Asoya Helbesta Kurdî amade kiribûn niha ev yek jî amade kirin. Ji amadekaran Mazlum Ozdogan ku agahî dan me, dibêje ku fikra çêkirina "Peyvdank"ê, ku wekî guhertoya kurmancî ya lîstika navdar Scrabble e, cara pêşî di sala 2016'an de hatiye bîra wan ku tiştek wisa bikin.  Ew wisa dibêje, "Min çend caran dest bi xebatê kir, lê her carê nîvco ma. Sala borî me careke din dest pê kir û di encamê de ev lîstik bi serkeftî amade bû."

Armanca ji vê lîstikê ev e ku ji bo parastin û pêşxistina ziman û çanda kurdî bixebitin. Heta niha wan projeyên wekî "Gotingeh: Sepana gotinên stranên kurdî", "Asoya Helbesta Kurdî: Sepana helbestên kurdî", "Tirşik.net: Programsaziya ferhenga înteraktîv a kurdî" amade kiriye û niha jî "Peyvdank". Ew dibêje, "Niha jî bi kêfxweşî em Peyvdankê diweşînin. Armanca me ya sereke ew e ku kurd lîstikan bi zimanê xwe bilîzin, peyvên nû hîn bibin û peyvên ku jixwe dizanin bi awayekî kêfxweş bikar bînin, ji bîr nekin and jî awayê wan ên rast hîn bibin.

Lîstik Çawa Tê Lîstin?

Lîstika Peyvdankê li ser tabloyekê tê lîstin. Rêzikên wê yên sereke ev in: Her lîstikvan bi tîpên tesadufî dest pê dike. Li gorî bikaranîna di zimanê kurdî de, pûana (xala) her tîpekê heye. Tîpên ku kêm tên bikaranîn, pûanên wan zêdetir in. Lîstikvan van tîpan li ser tabloyê wekî xaçepirsê bi cih dikin û peyvên kurmancî yên watedar çêdikin. Divê her peyveke nû bi tîp an peyvên berê ve girêdayî be.

Li ser tabloyê çargoşeyên taybet hene. Ger lîstikvan tîpan deyne ser van qadan, pûan du qat an jî sê qat zêde dibin. Lîstikvanê/a ku bi stratejiyeke baş pûanên herî zêde kom kiribe, lîstikê qezenc dike.

Ji bo daxistinê lînk:
play.google.com/store/apps/details?id=dev.mergesoft.peyvdank