Diyarname
Weqfa Guneştekîn ji bo piştgiriya Weqfa Îsmaîl Beşîkçî û hurmet ji bo civaknas Îsmaîl Beşîkçî şevek li dar xist. Di şeva bi xwarin de ji siyasetmedaran heta karmendan gelek kes amade bûn.

Serokê Weqfa Guneştîn hunermend Ahmet Guneştekîn û Serokê Weqfa Îsmaîl Beşîkçî İbrahim Gurbuz axaftina destpêkê kirin. Gurbuz qala xebatên weqfê kir û dûre got ku pêdiviya kurdan bi potansiyela entelektuel heye. 

'NIŞFEKE BI ZANYARIYA MILÎ'
Gurbuz diyar kir ku birjûwaziya tirkan wekî Sabanci, Koç, Ulker û ên din gelek piştgirî didin xebatên çandî, butçeyeke mezin vediqetînin û wiha dom kir, "Derdora karsaziya kurdan butçeyê bo vê venaqetînin, yan jî gelek hindik vediqetînin. Gere em jî ji bo hunerê, çandê, zanistê razemenî bikin. Gere em nifşeke nû bi zinyariya milî, çand û zanistê pêş bixin."

'BEŞÎKÇÎ WIJDANÊ DINYAYÊ YE'
Hunermend Ahmet Guneştekîn jî di axaftina xwe de li ser qîmeta Îsmaîl Beşîkçî sekinî û got, "Hinek însan wijdanê mirovahiyê ne. Îsmaîl Beşîkçî tam di dema mirovatî bêdeng bûbû de axivî. Li ser mijarên ku kesî newêrî bîne ziman ew li ser sekinî. Dizanî wê tenê bimîne lê bi paş ve gav neavêt. Ji ber ku ji bo wî rûmeta mirovahiyê ji kursî, kariyer û tirsan wêdetir bû. Bi salan ew hat dehfdan, avêtin girtîgehê lê tu tiştî nikarî wî ji nirxên wî dûr bixe."

Guneştekîn nexweşiya Beşîkçî bibîr xist û got ku xwezî ew jî îşev li nava me ba û sipasiya kesên piştgirî dane vê şevê kir.

Serokwezîrê Herêma Kurdistana Federe Mesrûr Barzanî peyama piştgiriyê şand şevê.
Îsmaîl Beşîkçî ku li Amedê tê dermankirin bi awayekî online beşdarî şevê bû lê zêde nekarî biaxive. Doktorê wî dr Cenab Yildirim ku lê dinêre û li ber Beşîkçî bû silav li beşdaran kir û sipasiya wan kir.

Piştî axaftinan pîştî hunermend Rewşan derket ser dikê, dûre hunermend Delîl Dîlanar bi stran û klamên xwe coş dan şevê.