Diyarname
Li Roboskiyê 34 gundiyên kurd di encama bombebarana balafirên şer ên Tirkiyeyê ve hatibûn kuştin. Piştî bûyerê Serdozgeriya Komarê Amedê ya bi Rayeya Taybet li ser meseleyê lêpirsîn dabû dest pê kirin. Niha Wezareta Dadê nivîsa "rayeya we ya li ser vê yekê nîn e" ji Serdozgeriyê re şand û serdozgerî jî ev lêpirsîn ji Dozgeriya Leşkeriyê re şand.

Serdozgeriya Komarê Amedê ya bi Rayeya Taybet heta niha li ser dozê serî li tu fotina leşkerek nedabû û doz hema li cihê xwe rawestiya bû jî raye ji Serdozgeriya Amedê hat girtin û teslîmê Dozgeriya Leşkerîhate kirin. Ji niha û pêde dê Dozgeriya Leşkerî ya Serleşkeriya 7'emîn Kolordiya Amedê li dozê binêre.

Kaplan: Emê nehêlin doz bê girtin

Mebûsê BDP'ê yê Şirnexê Hasip Kaplan li ser vê yekê got ku Hikumeta AKP'ê pêşî li bicihanîna edaletê digire û wisa got: "Dixwazin lêpirsînê betal bikin, edaletê şaş bikin û bi 75 mîlyon mirovî re henekên xwe bikin. Ev nêzîktêdayîneke bi talûke ye. Berê di Doza Şemzînanê ya pirtûkxaneyê de jî heman tişt kirin. Lê dema biryar betal bûbû û doz dîsa hatibû ber destê dadgeha sivîl wan ceza xwaribû. Ji aliyekê ve biryara veşartina lêpirsînê didin, ji aliyê din ve dosyayê ji dadgeha leşkerî re dişînin, ev yek skandaleke mezin e. Em wekî BDP emê destûrê nedin ku komkujiya Roboskiyê bê veşartin."

Encu: Ev der cihê ku edalet bi dawî bûye ye

Ferhat Encu ku di bûyerê de birê wî jî hatibû kuştin li ser rewşa dawî ku dosye şandine ber destê dozgeriya leşkerî got ku ev gav gava ku êdî hiqûq û edalet bi dawî bûye ye. Encu wisa got: "Helwesta AKP'ê xwe nîşan dida ku dê tiştek wisa çêbibe. Mixabin ev der cihê ku edalet û mirovahî lê bi dawî bûye ye."
Her wiha Encu xwest ku meclis dest biavêje meseleyê û dosyeyê li benda dozgeriya leşkerî nehêle.