Efsera bi navê Çira Ehmed Letîf a ji parêzgeha Silêmaniyê, îro bi fermî wekî wekîla Seroka Dadgeha Hêzên Ewlekariya Navxweyî îro dest bi kar kir. Wezareta Navxwe ya Hikumeta Herêma Kurdistanê ev biryar wekî beşek ji pêşxistina şiyan û rola jinan pênase kir.

Ev tayînkirin di demekê de tê ku jinên kurd tevî astengiyên cur bi cur jî, ji bo bidestxistina wezîfeyên bilind têdikoşin. Bi ezmûna xwe ya qanûnî di Wezareta Navxwe ya Herêma Kurdistanê de, efser Çira Ehmed Letîf karî vê wezîfeya hesas bi dest bixe, ku berê tenê ji hêla mêran ve dihat birêvebirin.

Di nav du salên borî de, li başûrê Kurdistanê rêjeya jinan ku beşdarî rêveberiya bajar û bajarokan dibin û wezîfeyên îdarî digirin, zêde bûye. Ev gava nû di nav dezgehên ewlehiyê de wekî xalek werçerxê ya nû di dîroka dadweriya leşkerî li başûrê Kurdistanê de tê hesibandin.

Dema du sal berê Helebçe bû parêzgeh Nûxşe Nasih bû waliya Helebçeyê. Bi vê yekê re bû cara yekem ku li Başûr jinek dibe waliya parêzgehekê.  

Rojnews - Diyarname