Şengal

Rêveberiya Xweser a Şengalê ragihand ku li dijî Şengalê planên nû yên qirêj di rojevê de ne û got: “Li şûna ku hêzên berxwedanê yên dema fermanê Şengal parastin were naskirin, siyaseta tunekirinê tê ferzkirin. Em peyama xwe digihînin Serokwezîrê Iraqê Sûdanî û bang dikin ku hikumet helwesteke zelal û cidî nîşan bide. Rêveberiya Xweser a Şengalê amade ye ku hemû pirsgirêkan di çarçoveya yasayî de çareser bike.”

Rêveberiya Xweser a Şengalê derbarê gef û metirsiyên nû yên li ser Şengalê û planên ku îradeya civaka êzidî dike hedef daxuyanî da çapemeniyê. Rêveberiya Xweser a Şengalê da zanîn ku li gor agahiyên hatine ber destê wan, planên nû yên qirêj ên li dijî Şengalê di rojevê de ne û ji bo rewşa heyî peyama xwe rasterast gîhand Serokwezîrê Iraqê Mihemed Şiya Sûdanî da ku li hemberî van plan û tevgerên bi guman hikumeta Iraqê helwesteke zelal û cidî nîşan bide. Rêveberiyê her wiha diyar kir ku ji her guhertinek ku bi zorê li Şengalê were ferzkirin jî ewê dewleta Iraqê wekî berpirsyarê yekem bibîne.

Rêveberiya Xweser a Şengalê her wiha îşaret pê kir ku, li şûna ew hêzên berxwedanê ku di fermanê de parastina Şengalê kirine ji aliyê hikumetê ve werin naskirin, siyaseta tunekirinê li ser îradeya civaka êzidî tê meşandin ku ev yek nayê qebûlkirin. Rêveberiya Xweser a Şengalê her wiha helwesta xwe ragihand ku ew amade ne hemû pirsgirêkên heyî di çarçoveya yasayî de çareser bikin û banga berpirsyariyê li raya giştî kir.

Di daxuyaniyê de hat gotin ku piştî gefên Wezîrê Karên Derve yê Tirkiyê Hakan Fîdan, li derdora Şengalê liv û tevgerên ne asayî hatine dîtin û hin kesayetên ku di bin xizmeta berjewendiyên dewleta Tirk de ne bi her awayî hewl didin ewlahiya herêmê têk bibin.

Bang li Serokwezîrê Iraqê Sûdanî hat kirin û wiha hat gotin, "Ji bo vê rewşa bi guman a heyî, em peyama xwe rasterast digihînin Serokwezîrê Iraqê Mihemed Şiya Sûdanî û bang dikin ku hikumet li hemberî van hewildanên bi guman helwesteke zelal û cidî nîşan bide; ji ber ku her bûyereke leşkerî, siyasî an civakî ya ku jiyana gelê me bike hedef, wê karesatên mezin bi xwe re bîne û civaka me ya ku hêj birînên fermanê di dilê wê de ne, wê nekaribe zilmeke wiha nû rake. Em wekî Rêveberiya Xweser a Şengalê, ku bi salan e ji bo vegera gelê xwe û jiyaneke azad bi hêzên xwe yên wekî YBŞ, YJŞ û Asayîşê bedelên giran didin, her dem amadehiya xwe ya ji bo diyalogê nîşan didin da ku pirsgirêk bi awayekî qanûnî werin çareserkirin. Em wekî Rêveberiya Xweser a Şengalê amade ne ji bo ku hemû pirsgirikên heyî di çarçoveyên yasayî de çareser bikin. Heta niha me her dem hewl daye ku civaka xwe û erdnîgariya Şengalê ji qadên şer dûr bixin, lê di rewşeke berevajî de û ji bo her guhertineke ku bi zorê were ferzkirin, emê dewleta Iraqê wekî berpirsyarê yekem bibînin. Em bang li hemû aliyên aşitîxwaz û dijberên şer dikin ku li hemberî van planan bibin xwedî helwest. Her wiha bang li gelê xwe, hemû hêzên siyasî, civakî û leşkerî dikin ku ji bo parastina mafên civaka êzidî û hemû pêkhateyên Şengalê, bi yekîtiyeke xurt a neteweyî tevbigerin û rê nedin ku aliyên nexêrxwaz careke din Şengalê bikin qada şer û malwêraniyê.”

Rojnews