Diyarname
Lehiya çend roj berê rabû zirareke mezin da Pirtûkxaneya Giştî ya Çemçemalê.

Li Herêma Kurdistanê di çend rojan de baran û pêre jî lehiyeke mezin rabû. Vê lehiyê bandoreke mezin li pirtûkxaneyê jî kir. Di encama lehiyê de zêdetirî 4 hezar pirtûkên cur bi cur û zêdetirî 7 hezar kovar û rojname wêran bûn. Rêveberiya pirtûkxaneyê da zanîn ku hemû tiştên di pirtûkxaneyê de xirab bûne û nikare bên karanîn.

BI DEHEZARAN BERHEMAN ZIRAR DÎTIN
Rêveberê Pirtûkxaneya Giştî ya Çemçemalê Êrîş Ebdulrehman li ser zirar û ziyanên pirtûkxaneyê ji bo Rojnewsê got: “Mixabin vê karesata jîngehê Pirtûkxaneya Giştî ya Çemçemalê jî bi xwe girt ku yek ji kevintirîn pirtûkxaneya Çemçemalê ye. Ev pirtûkxane di sala 1976’an de hate damezrandin û serpereştiya 10 pirtûkxaneyên din jî dikin. Gelek pirtûkên me yên zanistî, dîrokî, erdnîgarî û felsefî êdî kêrî bikaranînê nayên. Her wiha zêdetirî 7 hezar kovar û rojname di bin avê de mane. Ji ber lehiya giran, hinek dosyayên karmendên pirtûkxaneyê jî pûç bûne. Divê lijneyek were avakirin ku pirsgirêkê di zûtirîn demê de çareser bike.”

'HINEK PIRTÛK ÇAPA WAN A YEKEM BÛ'
Êriş Ebdulrehman rexne li bê helwestî û bêxemiya hikumet û aliyên peywendîdar kir û wiha domand: “Mixabin heta niha vê kêliyê jî tu berpirsên îdarî, hikumetê û parlementoyê serdana wan nekirine. Ev yek cihê fikarê ye. Ji bilî wêranbûna rêjeya zêde ya pirtûk, kovar û rojnameyan, hemû kelûpel û pergalên di pirtûkxaneyê de xirab bûne û nikare bên karanîn. Dibe ku em bi demê re bikaribin wan vegerînin. Lê pirsgirêk ev e ku hinek pirtûkên çapa yekem bûn ku dibe li Iraqê jî tune bin.”

'ME VAN SALAN GELEK PIRTÛK BERHEV KIRIBÛN'
Karmenda pirtûkxaneyê Şoxan Îbrahîm jî li ser heman mijarê wisa got: “Min xwe gelek xirab hîs kir. Ez hatim pirtûkxaneyê û dest bi girînê kirim, ji ber ku tiştek nema bû. Kelûpelên me wêran bûn. Ez li beşa rêveberiyê dixebitim. Odeya min, kompîtura min û hemû tiştên me wêran bûn. Bi rastî ev karesatek mezin bû, pirtûkxane jî yek ji cihên herî zêde zirar dîtî bû. Zirar pir zêde ye. Ez dikarim bêjim ku ji sedî 70 heta 75’ê pirtûkan wêran bûne. Pirtûkên wêranbûne jî pir pir girîng bûn. Me di van salan de gelek hewl da bû û gelek pirtûk berhev kiribûn. Heta ji bo berhevkirina wan serî li gelek cihan da bû.”

Di lehiya li Herêma Kurdistanê de 5 kesan canê xwe ji dest dabû. Her ku pirtûkxaneye hinan kampanyaya berhevkirina pirtûkan daye dest pê kirin.