QAMIŞLO
Li gorî malpera Meclisa Sûriyeya Demokratîk (MSD), meclisê bi armanca nirxandina rewşa siyasî û guhdarkirina nêrînan civîneke berfireh li bajarê Vasteras ê Swêdê li dar xist. Sûriyeyên li Swêdê de dimînin, beşdarî civînê bû.

Hevserokê Nivîsgeha Têkiliyan a MSD’ê Hesen Mihemed Elî  civîn bi rê ve bir, rewşa Sûriyeyê bi giştî, her wiha dan û standinên di navbera Rêveberiya Xweser û hikumeta veguhêz de şîrove kirin.

Mihemed Elî bal kişand ser girîngiya lidarxistina konferansên yekîtiya kurdî û konferansa pêkhateyan ku li bajarê Hesekê hatibû lidarxistin û wekî gaveke sereke ji bo pêşxistina tifaqa navxweyî û sepandina rêgeza beşdariya wekhev a di navbera pêkhateyên Sûriyeyê pênase kir.

Li gorî malperê, Mihemed Elî di dewama axaftina xwe de senaryoyên gengaz û polîtîkayên pêwîst ji bo çareserkirinê ku di têkiliyên di navbera hêzên destwerdanê de hevsengiyek çêbibe şîrove kirin. Her wiha bal kişandin ser peymana 10’ê Adarê û peymana dawî ya entegrasyona QSD’ê, nenavendîbûnê, agirbestê û pêkanîna guhertinên destûrî yên pêwîst.

Mihemed Elî girîngiya vegera ewle û bi garantî ya koçberên Efrînê, domandina hewldanên siyasî bo gihandina biryarên konferansa yekrêziya kurdî bo Şamê û civaka navneteweyî û herêmê vegot.

Beşdaran jî ku nêrînên xwe parve kirin, nexşeya hevsengiya li herêmê û bandora wê li ser siberoja Sûriyeyê, doza koçberên Efrîn, girîngiya pergala nenavendî şîrove kirin. Beşedaran xwestin ku mîna van civînan dewam bike da ku têkiliyên bi MSD’ê re bidomîn, di heman demê de ji geşedanan agahdar bin.

Di dawî de Mihemed Elî bersiva pirsên beşdaran da.