___Dilbirîn Dilo ___

Bîranîn wekî moriyên gerdeniya dayikekê li pey hev rêz bibin û li nava kezeba dahatiye xwe bidin neqişandin helbet dê dema nihayîn bi rengên cihê were wênandin. Li rexmî vê xeyalên dahatiye jî dibin derbeyên firçeyekê, şiklê xwe yê dawî ango rengê jiyaneke rewnaq digire. 

Helbet em ê di nava bîranîn û xeyalan de çûn û hatineke xweş bikin ku jiyan li me were rehmê, ango em jiyana xwe rengîntir bikin. Rengîniya rabirdû û dahatûyê dê tim bi bextewarî nebe lê wê watedartir bibe. 

"Gava Stêrk Dikevin" 
Ev hevok çi tîne bîra mirov?  
Ez ne bawer im kesek rastî vê hevokê were û çîrokeke bextewariyê bipê. Stêrk sembola ronahiyê an jî sembola hêviyê ne dema stêrkek bixurice mirov fêm dike ku kêmaniyek çêbûye. 

Kadîr Stêra jî pirtûkek bi navê "Gava Stêrk Dikevin" nivîsiye. Wekî ji nav jî diyar e pirtûk behsa çîroka stêrkên ronahiya wan hatiye vemirîn dike. 

Di serî de pirtûk wekî bîranîna zarokên zarok mane dest pê dike û ew zarok dê tim zarok bimînin helbet. Zarokên sarincî, zarokên sêzdeh gulexwarî, zarokên xwîna wan tev li yên bûyî û hwd. 

Lê zarokek ji wan zarokan mezin dibe. Erê di vê çîrokê de rihê zarokekî di bedena pitikekê de diavêje û mezin dibe, mezin dibe û çîroka zarokatiya me dinivîse.  

Arem, Enwer ango Ares....... 
Arem kî ye? 
Enwer kî ye? 
Ares kî ye? 
Arîna kî ye? 
Stî kî ye? 
Keçika enqereyê kî ye? 
Mijar li ku diqewime? 
Rastî ne ev qewimîn an xeyalî ne? 

Ev pirsên hanê wekî glokekê di mejiyê xwende de li hev digerin. Vebêjê çîrokê qarekterê sereke Arem, bi destê mirov digire dibe gundekî Kurdistanê, ji wir dibe Pragê. Di nava bîranîn, rasteqînî û xeyalan de çûn û hatineke bi êş lê watedar li dar dikeve. 

Belbî jiyan an jî mejiyê mirov trêneke ku di nava stasyonên rastî û xeyalî de mirov digerine. 

Ev çîrok, vebêja Aremê rêwiyê navbera bîrananîn û xeyalan e. Çîroka sirgunekî rih e, çîroka sirgunekî welêt e belbî jî çîroka rihekî sêwiyê Stiyê ye ku di bedena keça xwe de li malzaroka diya xwe digere.  

Kadîr Stêra bi terzeke derûnî di penceraya zemên re berê xwendeyên xwe dide bîranîn û xeyalên penaberekî. Fermo di vagona bîranînan de xwe xweşik bi cih bikin û berê xwe bidin zarokatiya xwe an jî di vagona dahatûyê de xeyalan biwênin da bi rengê rastiyê hatibe xemilîn. 

***

Nİvîseke din a Dilbirîn Dilo ya ku berê di Diyarnameyê de hatiye weşandin:

- Aşa êşên jinan