Diyarname
Di rojekê de li gelek bajaran, gelek êrîşên li hemberî rêveber û ofîsên BDP'ê pêk hatin. Her wiha Wekîlê Şaredarê Kanîreşê yê BDP'yî jî hat girtin.

Vane êrîşên li dijî BDP'ê yên rojekê:

Êrîşê Serokê BDP'a Elezîzê kirin

Komek kes ku gotin nijadperestin serê sibeya 16'ê mehê saet 09.30'î de êrîşê Serokê BDP'a Elezîzê Turan Çelik kirin. Di êrîşê de Çelik ji serê xwe û ji hin cihên xwe yên din bi giranî birîndar bû. Turan Çelik ku rakirin nexweşxaneyê, hate gotin ku bi giranî birîndar e, gelek xwîn jê çûye û talûkeya jiyana wî heye.
Piştî bihîstina bûyerê Mebûsa BDP'ê ya Amedê Emine Ayna û Serokê BDP'a Dêrsimê Şerafettin Halis û gelek BDP'yî çûn nexweşxaneyê.

Li Çewlikê êrîşê avahiyê kirin

Li Çewlikê nijadperestên di bin parastina polîsan de bûn êrîşî avahiya BDP'a Çewlikê kirin. Nijadrperestan camên avahiyê şikenandin

Wekîlê Şaredarê Kanîreşê hat girtin

Şaredarê Kanîreşa Çewlikê yê BDP'yî Ferit Çelik di 4'ê avrêla îsal de hatibû girtin. Niha jî Wekîlê Şaredar Selim Yildirim hat tewqîfkirin.
12'yê mehê polîsan bi ser avahiya BDP, Şaredarî û hin malan de girtibû û 28 kes girtibûn bin çavan. Pêşî 4 kes hatibûn berdan, îro jî (16'ê mehê) ew 24 kes dexistin edliyeyê. Ji van 9 kes hatin tewqîfkirin ku di nav van de Serokê BDP'a Kanîreşê yê berê Şemsettin Ozer, Şaredarê Kanîreşê Selim Yıldırım, endamê Meclisa Şaredariyê Nevzat Azak, endamê BDP'ê Umit Oz, Mehmet Zeki Sayak yê 75 salî, İbrahim Karabag, Lutfi Karabag, Mehmet Karabag û Riza Karabag hene. Ev kesên bi îdîaya "Endamtiya rêxistinê", "alîkariya ji bo rêxistinê" hatin tewqîfkirin, ew şandin Girtîgeha Tîpa M ya Çewlikê.

Ji sala 2009'an de li hemberî siyasetmedar, şaredar, endamên meclisên şaredarî û endamên BDP'ê pêla tewqîfkirina didome. Di encamê de niha 6 jê mebûs, 34 şaredar, bi sedan endamên meclisên şaredarî û siyasetmedar, bi giştî li dor 8 hezar kesên eleqedarê BDP'ê girtî ne.

***

Nûçeya eleqedar:

- 'Kanîreş keleha BDP'ê ye, em nadin kesî'