Diyarname
Bi navê "Plandanîna Zimanê Kurdî Di Mînakên Korî Zanyarî Kurd û Enstîtuya Kurdî Ya Parîsê Da" pirtûkek nû derket. Pirtûk ji aliyê Zulkuf Ergun ve hatiye amadekirin û ji Weşanên Nûbiharê derketiye.

Plandanîna zimanî plandanîna paşeroja neteweyan e û asta plandanîna zimanî asta pêşketin û xurtiya neteweyan nîşan dide. 
Plandanîna zimanî bernameya vîn û vîzyona paşeroja neteweyan e.
Ev xebata li ber dest jî dike ku dîroka xebatên plandanîna zimanê kurdî berbiçav bike û bi taybetî jî li ser xebatên du dezgehên giring ên zimanê kurdî raweste ku ew jî Korî Zanyarî Kurd û Enstîtûya Kurdî ya Parîsê ne. 
Nivîskar pirtûka xwe bi ser van re amade kiriye û pêşkêşî xewndevanna kiriye. Ew dibêje, "Eger em ji hewldanên plandanîna zimanî ya pêşîyên xwe û ji zarên din ên zimanê kurdî sûd wernegirin û nikaribin nerîteke hevbeş çêbikin dê hewldanên me bi tu awayî arîkarîya hevgirtin û nêzîkkirina zar û şêwezarên zimanê kurdî nekin û negihîjin armanca xwe.
Ji alîyê din ve eger em benikên ziman, edebîyat û çanda kurdî di çarçoveya nerîteke hevbeş de bi hev xurt nekin û ji wan werîsên xurt çênekin dibe ku di paşerojê de ev benik ji hev biqetin û parçebûn yan mirineke yekcarî pêk bê. Ev xebat ji vî alîyî ve beşdarî û piştgîrîdaneke dilsozane ye ji bo bizavên xurtkirina nerîta zimanî û xeyala hevgirtina zimanî ya paşerojê."

Zulkuf Ergun kî e?
Nivîskar Zulkuf Ergun di sala 1980'yî de li Licêya Amedê hatiye.
Di 2001'ê de ji beşa Ziman û Edebîyata Tirkî ya Zanîngeha Dîcleyê mezûn bûye. Di sala 2012'yan de ji Zanîngeha Mardîn Artukluyê di Beşa Ziman û Çanda Kurdî de bawernameya mastirê û di 2017'an de jî ji Beşa Zimanê Kurdî ya Zankoya Zaxoyê bawernameya doktorayê wergirtiye. Di sibata 2023'yan de pileya doçentiyê wergirtîye.
Ji 2012an û vir ve li Zanîngeha Mardîn Artukluyê di Beşa Ziman û Çanda Kurdî de wek mamosta kar dike û li vir di bernameyên lîsans û mastir û doktorayê de dersên edebiyata nû dide. Heta niha di çendîn kovarên akademîk de gotarên wî hatine weşandin. Herweha bi navê Bajar-Edebiyat û Cizîra Botan (2014), Nerît û Helbest (2017) û Abdulla Peşêw Rizgarkerê Dawî yê Helbesta Kurdî (2021) sê pirtûkên wî hatine weşandin. Ji bilî hin xebatên wî yên hevbeş ên hînkirina zimanî, ji Kurdiya Soranî bi navên Rêzimana Kurdî KurmancîSoranî (2013), Şevnameya Şa‘îrêkî Têhnî (2016) û Şev Nîne Hûn Neyêne Xewna Min (2019), Ber bi Zertavê (2023) çar pirtûk kirine Kurmancî û bi navê Demsala Nan jî pirtûkeke çîrokan ji Farisî kiriye Kurdî.

- Plandanîna Zimanê Kurdî Di Mînakên Korî Zanyarî Kurd û Enstîtuya Kurdî Ya Parîsê Da / Zulkuf Ergun / Nûbihar / 2025 / 376 rûpel / Kurdolojî