Diyarname
Qrêş û Mala Lênerînê ya Zarokistan a Perperîkê ya girêdayî Zarokistana Şaredariya Peyasa Amedê di çarçoveya çanda ‘Kosegelî’yê de Serê Salê pîroz kirin.  Li Farqîna Amedê jî bi pêşengiya Şaredariya Farqînê kosegelî li kuçe û kolanan geriya, Serê Salê pîroz kir.

ÇALAKIYA LI PEYASÊ
Qrêş û Mala Lênerînê ya Zarokistan a Perperîkê ya girêdayî Zarokistana Şaredariya Peyasa Amedê di çarçoveya çanda ‘Kosegelî’yê de ji bo pîrozkirina Serê Salê çalakî li dar xist. Ji bo çalakiya Serê Salê zarokan cilên neteweyî li xwe kirin, bi lêdana erbaneyan derbasî avahiya şaredariyê bûn û serdana Hevşaredar Bêrîvan Gulşen Sîncar kirin.* Hevşaredara Peyasê jî li gor pîrozbahiyên Serê Salê xelat li zarokan belav kir.
Zarokên Qrêş û Mala Lênerînê ya Zarokistanê jî cilên neteweyî li xwe kirin, Kosegelî gerandin û Serê Salê pîroz kirin.

ŞANO Û KONSER BO SEDAN KESAN
Li aliyê din li ÇandAmedê jî bi beşdariya sedan kesî şahiyeke hat li dar xistin. Şaredariya Peyasê bi hevkariya Sanatça Organîzasyon, Komeleya Çand û Hunerê ya Dîcleyê û Şanoya Bajêr a Amedê “Şahiya Sersala Kurdî” li dar xist. Di şahiyê de lîstikvanên Şanoya Bajêr lîstikên li gor sersalê pêşkêş kirin, hunermend Rûken Yilmaz û Jehrmar  jî stranên xwe pêşkêş kirin.
 
ÇALAKIYA LI FARQÎNÊ
Li Farqînê jî ji bo Serê Salê çalakiya kosegelî li dar ket. Du lîstikvanan di çalakiyê de cih girtin; pêşî li nav Şaredariyê geriyan û dûre ligel Hevşaredarên Farqînê Sevîm Biçici û Kadri Esen daketin kuçeyan, dikan bi dikan geriyan û Serê Salê pîroz kirin.

ÇALAKIYÊN DIN
Li aliyê din li Çinarê bi beşdariya Hevşaredarên Çinarê Semra Akyuz û Mehmet Şerif Arzu çalakiya Serê Salê li dar ket.
Li Erxeniyê jî li Parka Botanik çalakî li dar ket. Hevşaredar Birsen Azak Bayar û Şiyar Guldiken û nûnerên saziyan beşdar bûn. Denbgêjan klamên xwe gotin.
 

**
* Wekî notek: Hevşaredarê Kayapinarê Ceniz Dundar 30'ê sermaweza 2024'an di çarçoveya lêpirsîneke de hatibû girtin,li ser îtîraza parêzeran îro (13.01.2025) hat berdan.