Diyarname
Kovara du mehane bi kurdî û tirkî Dilop bi hejmara xwe ya 36'an li pêşberî xwendevanên xwe ye. Kovarê di vê hejmarê de meseleya kuştina Narîn Guranê derxistiye pêş.
Kovara çandî, hunerî û polîtîkayê Dilop du mehan carek derdikevin û niha bi hejmara xwe ya mehên sermawez û berfanbarê li pêşberî xwendevanên xwe ye. Kovar her hejmarê mijarake sereke digire dest, di vê hejmarê de mijara kuştina keçika 8 salî Narîn Guranê girtiye dest. Kovarê bi sernavê "Çi bû sedema kuştina Narînê?!" dest avêtiye mijarê û Sezai Sarioglu, Yuksel Genç, Kemal Înal û Yusuf Karataş li ser meseleyê axivîne. Fewzî Bîlge jî li ser meseleyê ji bo kovarê wêneyekî saz kiriye.
BEŞEK LI SER ŞIVAN PERWER
Dilopê bi sernavê "Di 50'emîn salvegera hunera wî de silav li Şivan Perwer" cih daye du nivîs û helbestek li ser hunermend Şivan Perwer. Di vî warî de Vedat Yildirim bi tirkî bi sernavê "Elli Yilin Elvereni", Îsmaîl Dîndar jî bi kurdî "Hozan im hozan!" nivîsandiye. Her wiha helbestek Dr. Eskerê Boyik ya ku berê li ser Şivan Perwer bi navê "Bilbilê welatê min" nivîsandibû belav kirine.
7 HEVPEYVÎN HATINE BELAVKIRIN
Di hejmarê de 7 hevpeyvînên cuda hene. Ji van hevpeyvînên vê mehê, Serpil Îlgun ligel Hîndekara Zaningeha Hewlêrê Doç. Dr. Arzu Yilmaz li ser pêvajoya ku niha li Tirkyeyê mijara serekeye axiviye. Yilmaz dibêje, "Tiştê niha têne jiyîn ne pêvajoya aştiyê ye." Bulent Ulus jî ligel Prof. Dr Hamit Bozarslan axivî ku ew jî dibêje, "Ez ne xêf im, ne jî derfetên heyî piştguh dikim." Yaşar Çiçek jî ligel lêkolîner Alişan Akpinar hevpeyvîn kiriye ku Akpinar dibêje, "Kurd, elewî, êdî ew bi xwe dîroka xwe dinivîsin."
Hevpeyvîneke din ligel akademîsyen Yalçin Çakmak li ser Xoresan, elewîtî û Dêrsimê hatiye kirin. Orhan Kurul ligel Çakmak axiviye. 
Her wiha Umut Yegin jî ligel karkerekî firinê yê li Amedê Vedat Boru axiviye ku ew dibêje, "Aştî çêbe ev der dê bibe cihet."
Ji hevpeyvînan yek tenê bi kurdî ye ku ew jî ji aliyê Huseyîn Ozdemîr ve hatiye kirin. Ozdemîr ligel derhêner Bilal Korkut li ser kurtefîlmê wî "Bîraxaneyê" axivî. Korkut dibêje, "Min dixwest behsa di cihekî de asêmayînbûnê bikim."
Li aliyê din Nurgul Deniz jî ligel Hevşaredara Sûra Amedê Gulan Onkol li ser şaredarîtiriya xwişk-bira û hevkariyê axiviye.
Recep Maraşli, Mervan Ozdemir, Îbrahîm Karca bi nivîsên xwe di kovarê de cih girtine.
Her wiha Dr. Eskerê Boyîk, Dildar Zeynel, Cihan Ezer, Yildiz Çakar jî bi helbestên xwe ked dane kovarê.
Ji bo têkilî:
dilopdergisi@gmail.com
Web: kovaradilop.net
twitter: @kovaradilop 
instagram: kovaradilop 
facebook: @kovaradilop

***

 
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.